不少明星屢傳整容，繼內地型男黃曉明被網友「翻舊帳」，指俊臉曾經「加工」後，近日再有網友「人肉搜索」了不少明星的昔日照作對比，Lynn亦慘成其中一分子，被上載數張造型老土的舊照。相中所見她不但面闊兼唇厚，更擁有一個鼻孔朝天的「插蘇鼻」，與現時面尖鼻直的索樣大相逕庭，隨即惹來整容疑雲。

熊黛林（左二起）與師妹Hilary齊齊蹲下與小朋友合照，愛心爆棚！

心情大靚的熊黛林，向米奇送上飛吻，未知城城收唔收到？

恨與城城拉頭馬

昨日Lynn身穿Isabell Marant斜膊連身短裙，偕師妹劉沛蘅（Hilary）出席在黃埔新天地舉行的《迪士尼Vintage Mickey經典米奇光影世界》，席間Lynn心情大靚地蹲下與小朋友合照，似乎未受「大執」傳聞影響。鑑於緋聞男友郭富城榮升馬主，記者即笑指Lynn亦榮升「馬主夫人」，她說：「唔好講呢個啦！唔關我事，唔係我隻馬！（城城話馬名叫『富黛』麻麻喎！）我廣東話唔掂，唔識改名！（想個名有黛或林字？）唔好同我有關，係佢隻馬，有城字就算！」

傳與Jerry合作

問到會否陪城城入場賭馬，自言愛狗多於愛馬的Lynn透露，從未到過馬場：「喺屋企歎住冷氣睇仲好！（城城可以帶你入廂房睇！）去睇吓都好！（城城係馬主，可以帶狗入去！）唔得o架嘛？呢啲特別待遇我唔要！」問到會否期待與城城一起拉頭馬，她即甜笑默認。另外，對於有傳她將跟言承旭（Jerry）合演台劇，Lynn說：「講得一定會講！（佢嚟咗香港有冇見面？）電視上見到佢算唔算？（同城城合作？）我都想，但冇機會！（邊個靚仔啲？）唔鍾意比較！」