昨日楊梓瑤（Carol）副學士畢業禮，但她認為寫真簽名會比穿畢業袍更彌足珍貴，故寧願缺席畢業禮也要簽名，早上9時半她先到電台與書展文化活動顧問團成員伍曼儀接受訪問，有十多名80後學生見證這場舌戰，Carol戴黑框眼鏡以純情學生造型迎戰，未開咪前，先與伍曼儀交談，但Carol明顯心情緊張，不時偷睇貓紙壯膽。

伍曼儀直斥o靚模寫真集意淫，但Carol只口窒窒回應。

經一輪舌戰後，Carol送上寫真集給伍曼儀欣賞。

自比畢加索名畫

早上10時開咪，伍曼儀表示看到報道指她舌戰o靚模，不滿有人將她擺上枱。問到是否覺得少女模特兒舉行簽名會是文化活動？Carol即口窒窒說：「我覺得算，簽名會可以係宣傳嘅一種，對自己寫真推廣更廣泛！」但遭伍曼儀反駁：「簽名會係咪文化，我未必認同！」她又重申並非針對Carol一位o靚模，更暗寸不認識o靚模，其後又直指o靚模寫真意淫：「今日好多寫真集，已經唔係從藝術角度去做，簡單嚟講係意淫，以前好多人好似葉子楣、葉玉卿都影過，但對象係成年人，依家對象好年輕，細過16歲都有！」最後Carol以書展不公平作總結：「其實寫真係一本書，本書有一定作者，少女模特兒只係主角，演繹作者要求嘅角色，所謂用身體其實都係被動。如果講到用身體演繹，自古以來好多Top Model寫真，或者名畫好似畢加索，都會用身體表達；而對於書展唔畀搞簽名會，我會唔開心，因為貿發局冇睇過我本書，已經拒絕我哋，本書已過淫審處，點解仲話意識不良！」

雖然被轟寫真集意淫，但Carol仍做足功課應付尖銳問題。

放大圖片

自嘲水準有限

經一小時舌戰後，Carol送上寫真集給伍曼儀，對於缺席畢業，她說：「事前已安排好簽名會，冇得改期，所以犧牲畢業禮，簽名會意義大過畢業禮！」提到與伍曼儀的對答表現，她說：「畀50分，好緊張，我係未畢業嘅學生，答問題水準有限，對尖銳突發問題未Carry到！」其後她換上一身低胸裙出席簽名會，雖然簽名會定於下午2時開始，但Carol卻姍姍來遲，問到是否被早上的訪問影響心情？她說：「我知佢唔係淨話我本書，真係聽到好多好意見，冇影響心情！（周秀娜出招送舊Bra？）我送唇印！不過錫手！」