去年國際中華小姐冠軍苟芸慧係公認嘅靚女，喺加拿大長大嘅佢，來港發展首要係練好廣東話，但就經常搞到笑話百出。有次活動嘅司儀問佢擇偶條件，佢就話：「最緊要『食』我同『食』我屋企人。」小小So聽完，好快就知佢係想搵個「錫」佢同「錫」佢屋企人嘅男友，唔通想搵個「軟飯王」咩？但原來佢仲有啲「有味」嘅笑話。
小小So：你啲廣東話仲爆出過咩笑料？
苟姑娘：有次我着住件吊帶衫，問經理人「有冇味道」？佢個樣即刻好奇怪。
小小So：點解問有冇味？唔通你有狐……？
苟姑娘：其實我係想問佢條吊帶「有冇歪到」？不過講唔正囉！哈哈哈……
苟姑娘已經好努力練廣東話，平時亦肯大膽講，佢話依家同人傾偈都唔講英文，叫大家畀啲時間睇佢進步喎！