日前張敬軒接受有線電視娛樂新聞台專訪，他在訪問中談到與關智斌的關係，事後在何國鉦（Dorian）的微博內有這樣一段說話：「剛才在家中看到張敬軒的專訪……而最令我敬佩的是他剛才在訪問中坦然承認他跟關智斌的一段同性關係，年輕人敢做敢認，愛得纏綿，比起很多經常戴着假面具做人的更幸福，希望大家都會繼續支持軒仔！」這番說話，隨即引起關注，短時間內被轉發逾三千次，以及被不少網站轉載報道，有軒仔的Fans留言對Dorian的言論表達不滿。雖然該段言論已被刪除，但仍未能平息眾怒。

慘遭攻擊即呼冤

被指引發事端的Dorian其後在微博澄清沒有發放有關言論，他接受電話訪問時強調：「我從來冇寫過，亦冇睇過軒仔嘅訪問。我今朝上微博發現有好多唔認識嘅人攻擊我，我都唔知發生乜事，我已經喺微博講咗唔關我事，但依然有好多Fans誤會我。我同朋友傾過，估計係我曾經用過公眾電腦上微博，畀黑客入侵，又可能係畀人知道咗我嘅密碼。」由於事態嚴重，他已向律師朋友諮詢意見，對方指黑客事件常有發生，他呼籲：「互聯網威力好大，大家要小心保護自己密碼，代我留言嘅人居心叵測，識我嘅朋友都知我唔會做啲咁嘅事，莊思敏都話有朋友試過畀黑客入侵。」

重播訪問正視聽

至於所謂的「出櫃」專訪，昨日有線在大娛堂節目中重播當日軒仔受訪片段以正視聽。訪問中，主持人問到軒仔與關智斌的關係時，軒仔只是回答：「OK！大家都係同事，好似一家人咁，有時會同對方父母食飯，一齊見面。我有諗一齊搞投資生意，唔好睇佢靚靚仔仔、好姿整，佢好慳家，好識計數。」完全沒有任何「出櫃」之意思。對此，關智斌說：「我哋一直係朋友，今次係笑話一則。」