傅穎（Theresa）獲准入書展舉行見面會，其Fans昨日通宵於會展外排隊，期望第一時間近距離接近偶像，為答謝Fans對寫真集《about her》的支持，Theresa漏夜簽書逾二千本。

傅穎自爆寫真集中，有多款過火照片被抽起。	傅穎的Fans昨日通宵於會展外排隊。	傅穎漏夜狂簽逾二千本寫真集，但她說：「為答謝Fans，簽名簽通宵都冇問題。」

Theresa於寫真集大解放，以褻衣示人，她直言日籍攝影師米原康正教她激發女人味：「着住底褲影相最初有啲尷尬，經米原指導後，情緒愈來愈投入，有時仲過咗火，要工作人員提醒我，所以有啲相因為尺度問題被抽起，惟有留番自己欣賞。」

有機會入場，Theresa推出一系列勁招：「我有100條限量版相機帶配寫真集發售，仲有『限定合照』同派發海報，《about her》寫真集見面會之後，仲有我嘅繪本散文《如果你是我》簽名會，到時會抽籤送出我嘅手稿，啲Fans通宵排隊支持，我會一早出現答謝佢哋，只要佢哋開心，一日走幾場，通宵簽名都冇問題。」

Miki出愛情小說

另外，學做才女的楊愛瑾（Miki）今年推出第一本愛情小品《抱瑾你》，她說：「我本書仲係一本電子圖文集，配合依家最潮嘅電子閱讀巿場，喺書入面我會同大家分享愛情經歷，探討女性裝扮嘅問題。」