本文重點
戴思聰生前桃李滿門，林文龍與林利亦是其徒弟，文龍昨晨6時許收到戴老師學生的電話，即趕到醫院見他最後一面：「我去到醫院，老師已經昏迷，我喺佢耳邊講：『唔使擔心，放心走啦！』」文龍十多年前曾跟戴老師學唱歌，斷續學了3年多，算是師徒關係：「好突然！老師年紀唔細，起碼佢唔使好似其他老人家咁受病痛嘅辛苦，走得好安詳！」
「唔使辛苦係福氣」
二人月前曾通電話約食飯，文龍續說：「之前通電話，佢把聲好雄壯，仲想我帶個BB一齊同佢食飯！（送別時有冇喊？）冇！我反而安慰師母同佢兩個女，話老師係走咗，但係知佢哋喊，咪盞令老師唔開心！（知老師心臟有事？）唔知，只知佢隻眼麻麻！（教你邊首歌最好？）我唱張學友嘅《吻別》發揮得最好，登台我都有唱，老師仲陪我錄音！」他更盛讚師母也很好，煲湯又煮飯。
至於另一徒弟林利昨晨趕到醫院，卻見不到戴老師最後一面：「我見唔到師傅最後一面，不過佢好安詳，好Good！（突然？）係！不過都係福氣，師傅唔使辛苦！（家人傷心？）佢哋都好理智！（家人好激動喊？）佢哋含住眼淚，三個女人都好堅強，師傅走咗唔使痛苦，只係家人辛苦啫！」