曾於八、九十年代叱咤一時的香港樂壇教父戴思聰,昨晨8時35分於灣仔律敦治醫院病逝,享年69歲。女兒戴蘊慧於昨晨10時25分向傳媒公布父親死訊,架着墨鏡的她眼泛淚光說:「辛苦晒各位!我依家有事同大家講,今(昨)朝我父親戴思聰老師已經喺8時35分離世,我父親係急性冠心病入院,再引起併發症!父親走嘅時候好安詳,佢嘅出殯事宜,之後會再同大家交代,辛苦晒!」據悉,戴思聰因急性冠心病引致中風及腎衰竭。
暫時唔辦身後事
離開醫院後,戴辛尉(葳葳)、戴母及愛徒洪楗華先返回炮台山寓所,及後再坐車到戴蘊慧位於堅尼地道寓所。據事後記者再致電蘊慧,她表示暫時不會辦父親身後事:「3日3夜冇瞓,好攰!大家要休息吓,因為擔心會病,已經送咗媽咪返屋企,全日休息唔出街,會叫外賣!」
另一邊廂,稱戴思聰為「老竇」的東東,昨晨取消工作,專程搭早機由北京返港。晚上8時許,身穿白衫、黑褲及黑鞋的他抵達戴蘊慧寓所。問到有否見戴老師最後一面?東東並無回應,師母甫見東東即抱頭痛哭,東東則搭實師母膊頭,令人心酸!而呂方及江欣燕亦分別於晚上抵達。
東東昨日接受電話訪問時表示,對於「老竇」逝世深感難過:「準備起飛時,已收到老師逝世消息,好難過!我想見師母,慰問佢哋!(同『老竇』幾耐冇聯絡?)都有一段時間,間中有通電話!一直唔知佢有心臟病,只知佢腰痠同眼有事!」對於早年雙方曾發生合約糾紛,他說:「冇乜嘢啦!大家師徒一場,以前糾紛唔算係乜!師徒之間有份情,人與人之間感情最緊要,過咗去嘅嘢唔想提!(邊個行出第一步?)唔使回顧!只記得佢好錫我,有好多難忘回憶!」
「以前糾紛唔算係乜」
驚聞「老竇」逝世後,東東返港後即與戴家聯絡:「落機已同葳葳通電話,叫佢哋好好休息,師母呢幾晚冇瞓,我都想見老師最後一面,不過要等佢屋企人安排!(你有冇喊?)唔好問呢啲!我覺得遺憾同悲痛,見唔到最後一面,一直好思念!(出席喪禮?)會返嚟出席喪禮!」
回顧17年的師徒情,東東悲喜交集:「諗番第一日戰戰兢兢打畀老師搵佢學唱歌,自己去北角搵佢哋,當時師母開門畀我,好記得師母揸住個蘋果,之後仲畀我食!老師特別錫我,教我唱歌,又去KTV練歌,同埋帶我見唱片公司(寶麗金),我好感激佢!」