譚詠麟（阿倫）昨晚為一連8場《譚詠麟2010再度感動演唱會》揭開序幕，全場爆滿，個唱於晚上8時半準時開始，至凌晨12時才完場，罰款5萬元。以一身閃爆造型出場的校長，打扮與出場方式十足已故巨星米高積遜（MJ），似要向對方致敬！適逢今年是其經理人公司25周年，自稱「年年25歲」的他自嘲說：「唱都唱咗25年，仲話自己25歲！」他又在台上公開換衫，大晒麒麟臂，有歌迷高呼：「好大呀！」又要求他剝光豬！

放大圖片	阿倫以一身型爆造型登場，似向米高積遜致敬。	意猶未盡的阿倫，拖着舞蹈員及樂隊成員謝幕。

甩嘴被噓

演出期間，校長兩度甩嘴及忘詞，台下傳來陣陣噓聲，他尷尬地笑說：「係咪要掟蕉皮呀？依家我唔錯得呀？」他還與一手提攜的樂隊Mr.扭身扭勢Jam歌，Mr.大唱成名作《如果我是陳奕迅》，並將歌詞內的「陳奕迅」改成「譚校長」，認真識做！

阿倫與樂隊Mr.勁舞Jam歌，完騷後又在後台合照。

放大圖片

晚上11時10分，阿倫以踢波比喻個唱有加時及12碼，然後讀出歌迷談及子女的信，並獻唱《欠了你》。喪唱3個半小時後，阿倫在後台接受訪問，談及罰款一事，他說：「主辦單位都有畀壓力，話如果我場場都係咁，同事雙糧有影響喎！」問到仔仔曉風有否撐場，他說：「有，但你哋一定見唔到。（唱《欠了你》畀佢聽？）唱畀天下父母聽。（想佢錫你多啲？）每個父母都想。」