得悉失明陳姓女歌迷自殺昏迷後，G.E.M.與樂隊Mr.一直非常擔心，當接獲該歌迷逝世的噩耗，G.E.M.昨晚仍非常難過，她表示原本打算前日下午到醫院送上打氣聲帶，但因院方不建議她前來，故最終沒有前往而留遺憾。而她早前已將三分鐘的錄音聲帶交給唱片公司，但未趕及交給其家人。

Mr.擔心有樣學樣

G.E.M.表示聲帶內容全是鼓勵說話：「我用鋼琴彈咗段音樂，希望音樂可以感染佢，同佢講無論發生乜事，只要努力去跨過，將來望番轉頭，就覺得係好小事，冇嘢唔可以克服，仲同佢講喺微博好多網民、歌迷祝福佢，為佢祈禱，大家都支持佢，叫佢唔好放棄。」問到錄音帶可會作為女歌迷的陪葬品？她說：「呢個交畀佢屋企人決定，睇吓有乜嘢可以幫到手。（出席喪禮？）都係尊重佢家人決定。」她自言曾遇低潮期，但經過今次事件，她明白生命才最重要。至於今次事件令歌迷分成兩派，有支持亦有留言攻擊，但G.E.M.表示不作回應。

對於女歌迷逝世，Mr.亦表示會向其親友致深切慰問，但不會出席喪禮，擔心歌迷有樣學樣，以為藉此可吸引他們注意。成員Dash覺得每個人總有脆弱時候，但要學識將困難化為正能量；成員Tom明白生存不易，但也不能輕言放棄生命。該女歌迷生前就讀的心光盲人院校長梁民安表示，家人聞死訊表現平靜，學校社工及醫務社工會盡力協助。