昨晚「愛看」互動平台正式啟動，在海港城海運大廈舉行啟動禮，周秀娜（Chrissie）、林莉、梁詠琪、梁漢文、蘇永康、蔡少芬及老公張晉、吳浩康與詩雅等出席。書展臨近，眾女為谷宣傳搏到盡，Chrissie成為眾女的假想敵，要迎戰JC、Yumi和林莉等索女，問到JC寫真集力撼其寫真時，Chrissie大方迎戰，表示是正常行為：「嚟緊我哋一齊拍戲，戲內都係敵對角色。」
Keep住煲住
而JC揚言因拍寫真禁止男友埋身，被問到她與男友的情況是否一樣，Chrissie說：「我啱啱相反，Keep住煲住！（乜叫煲住？）即日日都有見住。」其寫真以洞房為主，問到是否先與男友綵排親熱動作，她笑着說：「都係做番平日嘅嘢。（會否禁止男朋友手多多、粗魯？）佢不嬲都好錫我，好溫柔、好有風度，總之我哋非常甜蜜！（點樣練習拍洞房照？）我影時盡量對住鏡頭，做出甜蜜嘅感覺。」
至於林莉借用老闆兼緋聞富豪男友的豪宅拍寫真，她透露是公司同事安排，問到是否由她開口借？林莉說：「佢不嬲都知我行蹤。（有指你哋已分手？）從來冇開始過，我同佢關係係佢係投資者。（有指你分手後生活質素下降？）公司不嬲都有好多資源，有車提供，但我今年二、三月時，向公司提出唔需要車服務，搭的士都好方便。」
主持《港男》
此外，無綫力邀Chrissie和呂慧儀擔任今屆《香港先生競選》主持谷收視，Chrissie表示初步知道要出席港男節目，呂慧儀則說：「收到通知要做主持，但唔知係咪同周秀娜合作，好期待。（期待3D泳褲？）知有3D效果，但唔知係咪泳褲喎！期待向嘟姐學嘢同近距離睇男仔，以前掛住畀分，今次可以專心睇男仔。（操弗身材亮相？）嗰晚注意力喺晒港男度，我努力做好司儀就得。」而有傳無綫嚴厲管束港男參賽者，如要求暫停上交友網站、高層親自接見及查家問底、嚴禁夜蒲及向傳媒放料等，淨化港男形象免再傳是非。