今年書展,貿發局擺明打壓o靚模,幾乎連有份出書的鍾舒漫(Sherman)及傅穎(Theresa)也殃及池魚,幸好她們同屬歌手身份,加上推出繪本及散文集,故獲貿發局放生,可舒舒服服在會展歎住冷氣舉行簽名會。不過,眼見今年的寫真模個個心口極具分量,加上宣傳手法無所不用其極,Sherman與Theresa亦豁出去行性感,與o靚模來個「肉」石俱焚!
向來包到冚的Sherman其實是有料之人,在繪本散文集《樂活.道》中,她盡顯骨肉勻稱的身材,更突破極限穿上處女三點式擺誘人甫士,在嚴寒天氣下瞓在馬路狂騷「事業線」,令人耳目一新!至於Theresa的寫真《about her》亦不輸蝕,邀得日本潮界攝影師米原康正操刀,身穿Deep V裙的她,除在按摩池中喪谷僅有的「事業線」外,更豁出去擺出自摸甫士,令人想入非非!
抵冷騷「事業線」
對於處女作,Sherman坦言相當期待:「呢本散文集從構思、拍攝到製作只花咗3個月,成件事好偶然,係我臨去加拿大做嘢前,公司先話出書,咁咪順道過去拍囉!雖然冇乜製作費,但攝影同化妝都有義助,好似蔣雅文幫我做攝影師。」她在短短兩日內更換8個造型:「加拿大好凍,除咗着比堅尼騷『事業線』外,我仲要瞓地影相,凍到冇知覺,真係好難忘!」
至於Theresa則坦言若非米原操刀,她不會如此性感,她說:「我信得過米原,加上配合新歌先會咁。(以後都行性感?)要睇反應同場合。」
另外,Theresa昨日出席環保活動時表示,除在書展中舉行簽名會外,還打算於本月24日到書展巡視銷情,翌日則在商場舉行簽名及新歌發布會。她強調今次性感,並非照跟「勁敵」鄧麗欣的跳唱路線,更自誇比對方更性感!
會展對對碰
《樂活.道》Vs《如果你是我》
推出日期:7月21日
簽名時間:7月23日4:00pm
有乜睇頭:預計派發200個籌,頭30位Fans可與Sherman一起祈禱及近距離拍照,並送贈親筆簽名相及各式贈券。
推出日期:7月21日
簽名時間:7月21日4:30pm
有乜睇頭:當日早上10時及11時,Theresa到攤檔派海報;下午簽名會,首100名歌迷獲相機繩,頭幾名更獲繪本手稿。