衣着篇
問 :着衫鍾意乜嘢款式同牌子?
Annie :鍾意Lady少少嘅衫,不過轉型後就要着多啲型格嘅衫,比較喜歡2%、Zara同DKNY等牌子。
Hailey :鍾意着比較深色同Rock啲嘅衫,依家好少着Cutie嘅,比較喜歡去H&M買嘢,亦鍾意2%。
問 :有咩穿衣之道?
Annie :一定要着得舒服,試過有次着條高腰褲襯背心,件背心時不時整起,又核突又唔舒服,搞到周身唔聚財。
Hailey :我比較懶,所以鍾意一啲One-piece背心裙,一定要配好多飾物點綴,例如超大戒指。
行動篇
問 :鍾意去邊度旅行?
Annie :我有西班牙血統,當然鍾意去西班牙啦!加上我喜歡皇馬,好想去巴拿貝球場朝聖。
Hailey :好想去埃及,係細個嘅夢想,雖然治安唔係太好,但金字塔、獅身人面像令我好嚮往。
問 :鍾意搭車定行路?
Annie :我好鍾意行路,唔落雨就盡量行路,遠啲都唔會搭車,不但可以減肥,對健康都好啲。
Hailey :我都鍾意行路,可以燃燒一下脂肪,又可以環保啲嘛!如果搭車,我就絕少會搭的士,因為喺其他交通工具上,先會留意到人生百態。
居住篇
問 :Dream House係點?
Annie :我想試吓住王宮,因為成日幻想變成公主,有間白雪雪嘅房,間房唔一定好大,但要似囉!
Hailey :我想間屋有個超級大花園,令我放假時可以喺花園歎咖啡,唔可以有蚊,唔想咁樣捐血。
問 :有乜嘢屋一定唔會住?
Annie :有鳳姐嘅閣樓一定唔會住,唔想見到啲男人上上落落。
Hailey :我唔鍾意間屋太多木嘅傢俬,感覺好舊,雨天啲霉味仲遲遲唔散。
飲食篇
問 :鍾意食乜菜?
Annie :梗係西班牙菜啦!最鍾意食辣雞,愈辣愈好!
Hailey :鍾意食馬來西亞同新加坡菜,佢哋嘅咖喱又唔係好辣,仲有少少甜味!
問 :最貴一餐食乜?
Annie :試過食西餐,有幾舊牛扒同三道菜,二人盛惠$5,000,又食唔飽喎!真係呻笨。
Hailey :我試過同七個朋友打邊爐,勁食海鮮、牛肉刺身,啲牛肉粒得手指咁大,埋單成萬蚊。
問 :鍾意飲乜?
Annie :一日三餐無可樂不歡,但依家要減肥,惟有忍口。
Hailey :最鍾意飲凍牛奶溝美祿粉,兩樣溝埋起化學作用,令牛奶變成粒粒,好有口感。
泳衣篇
問 :穿泳衣有乜事前準備?
Annie :一定要啱Size,件泳衣要綁緊啲,因為下身比較多肉,我會買一啲下身冇綁帶嘅泳衣。仲要做足防曬,因為好易曬黑。
Hailey :事前要做好安全措施,乳貼、雙面膠紙一定走唔甩,仲會準備定噴霧式防曬。
問 :鍾意乜嘢泳衣款式?
Annie :我鍾意型啲嘅款式,胸位一定要係三角形,最好有Pad同鋼線邊,個胸都會托得起啲。
Hailey :我鍾意有色彩嘅泳衣,着落會開心啲,會選擇下身有綁帶嘅款式,睇落對腳修長啲。