江若琳隔日菜湯

「我絕對唔贊成斷食！其實食得健康啲就可以，我有個餐單，將一個洋葱、三個青椒、五個番茄、半條西芹同一個椰菜煲湯，一個星期當晚餐咁食三次，可以清腸胃同去宿便，早餐可以食多啲生果，好似奇異果、木瓜，飲木瓜溝鮮奶仲有去油功效。」

成效：去宿便

傅穎跟足餐單

「過咗25歲，我覺得腰、臀同大腿特別容易積聚贅肉，所以要努力食營養餐單。朝早我會食白烚雞肉、麥片加無糖豆漿，晏晝可以食得豐富啲，但唔好食有汁嘅飯，晚上就唔好食澱粉質，飲品就只係飲水同無糖豆漿，過咗八點就唔好再食嘢，仲會做運動練肌肉。」

成效：練肌肉

梁詠琪戒飲凍飲

「千祈唔好暴飲暴食，我亦唔會飲凍嘢！因為會減慢新陳代謝，呢樣嘢對女人好緊要，新陳代謝快冇咁易肥，而且仲會成日磅重，提醒自己要減肥，做運動前仲一定會飲Slim Up，平時就會榨混合橙、士多啤梨汁飲，幫助美白。」

成效：美白減磅

鍾浠文吔蕉減肥

「我屬於水腫型，唔食飯同麵，淨係食菜同肉，食菜會揀好有益嘅西蘭花。我試過日本流行嘅香蕉減肥法，一早飲暖水加一隻蕉，當時個肚腩真係細咗，因為去到廁所。如果朝早塊面水腫，我會飲一杯齋啡，咁真係會瘦啲，但當然唔可以成日飲。」

成效：收肚腩

Jocelyn勤做Pilates

「唔會刻意節食，啱啱去洛杉磯同夏威夷旅遊勁食，全靠做Pilates收身，影Bra廣告之前嘅兩個禮拜，我差唔多日日都做，佢好似瑜伽咁，但就可以將啲肉向內推，肚腩唔會打褶，又可以拉直條腰骨，令身形同姿勢都靚啲，仲可以改善背脊痛！」

成效：收靚線條

Mandy Lieu反對斷食

「千祈唔好斷食，因為唔食嘢唔一定會瘦，嗰段時間可能只會冇咗肌肉而唔係脂肪。當你正常食番嘢嗰時，反而會容易積聚脂肪。我平時食嘢少糖分、少濃味，仲會做瑜伽、行山，幾忙都要做啲運動，好似沖涼前做Sit-up同拉筋。」

成效：踢走脂肪