事業篇
距離書展寫真戰還有10日，今年再度推出寫真的傅穎（Theresa）預備與乳模硬撼：「預咗大家會比較，我未必好似佢哋咁少布，形象上有適當露嘅地方就可以！雖然以前出過寫真，不過依家覺得嗰啲係靚相集，今次先係寫真！本身公司算保守，有啲動作係日本名攝影師米原康正叫我擺，都幾大膽！（擘腿？）佢影嘅女仔多數全裸，仲要擘腿，我講明我嘅底線唔係咁！」她透露寫真集有「冇眼線素顏」及「烈燄紅唇」等極端造型，一句「不與模比較」顯示她不屑與她們相提並論：「寫真對我嚟講只係工作一小部分！同米原合作好難得，如果唔係唔會特登出，本書係硬皮、大過A4，有收藏性！」
「化妝好似人性」
寫真是外界的焦點所在，Theresa卻花更多心血在繪本散文集上：「以往嘅文字鍾意修飾，今次嘅《如果你是我》好現實，第一部分講小時候，26歲睇番3、4歲嘅世界，中間講自己同代入人哋身份去睇愛情，最後一部分寫到好白，講黑暗同人性！（講舊公司金牌大風？）係喺圈中睇到嘅嘢，有猶豫過寫唔寫！化妝喺日本係禮儀，不過畀香港污名化！其實化妝只係將小缺陷修飾嚟增加自信，化妝好似人性，對住唔鍾意嘅人要化妝，話人嘅都應該諗吓自己都要化妝！」這番話很玄，她表示要留待看書時細嚼。
感情篇
Theresa心裏的黑暗世界難以用三言兩語來剖析，愛情事則較淺白，書中記錄了她代入媽媽的離婚經歷：「爹哋鍾意媽咪，當時個心容納一人，但後來有其他人出現。（影響你？）冇，我好冷靜！嗰時13、14歲，仲同媽咪講：『你開心就得！』我嘅愛情觀幾正面，朋友啲家庭完整，不過我嘅角度係冇一生一世！（受愛情騙子影響？）只可以話遇人不淑，踩咗隻腳入去，當上咗一堂！（悲觀？）只係貼近現實！曾經同比較好嘅男仔交往，拍拖要有未來先開始，當時有真心講過結婚，但愛情會隨時間變質！以前同依家都有諗結婚，但冇諗幾多歲！」
「冇溝通冇結果」
Theresa對婚姻有憧憬，講到羨慕謝霆鋒及張栢芝時，不禁甜絲絲說：「佢哋係模範夫妻，栢芝為家庭放棄事業，而我就工作第一！（有成就先結婚？）事業上要乜成就，好視乎精神狀態！我怕悶，需要工作，但結婚就未必好似依家咁搏！（生BB？）老公想都會！（有冇理想對象？）要揀成熟型，一定要係結婚對象，好睇對方性格，唔着重靚唔靚仔，溝通最重要，冇溝通冇好結果！共同目標同興趣都重要，圈內外反而冇所謂！才華方面同我啱啱相反仲好，最好佢數學同Common Sense叻，我唔係太識投資，媽咪成日叫我買樓，我就只係會儲多啲錢！」
「阿謙胸肌犀利」
緋聞多多的Theresa，最新力作是同門的羅仲謙及韓國舞蹈老師全洪福，雖然例牌否認，但她對二人有讚冇彈：「阿謙啲肌肉好似商標咁，好犀利，一講起肌肉就諗起佢！佢同港姐拍特輯，個胸仲大過啲港姐，不過我欣賞佢啲腹肌多啲，我都想操到佢咁！我哋好好朋友，佢好乖，但未去到理想對象呢步！」講到全洪福，她更不禁哈哈笑：「我唔接受師生戀！冇翻譯溝通真係有問題，佢只係識講簡單嘅英文生字，我又淨係識講『你好』呢啲韓文，有時講到忟我會講番廣東話，佢會講番韓文，我哋仲會用埋身體語言，佢講Dog、Hair，然後『呼呼呼』，原來話佢隻狗甩毛！」