近期o靚模話題不斷，被禁足書展更是全城熱話。面對來勢「胸胸」的「露模」，潮模楊汀叮坦言冇有怕，不欲與「露模」正面交「峰」的她，視師姐Angelababy為目標，希望衝出香港！
今年寫真戰戰況激烈，各路o靚模設法跑出，為滿足一班宅男，性感不設底線！面對強敵當前，將推出寫真集的潮模楊汀叮信心十足，無懼與「露模」比較︰「寫真入面有好多靚相，仲會分享一啲扮靚心得，與別不同！」早前擘髀拍攝寫真的她坦言，如此瞓身並非受「露模」的噴血相刺激︰「咁啱角度問題啫！所以動作比較性感，並唔係特登想出位！」雖然不少o靚模在寫真集中大賣性感，但汀叮揚言不會降低性感尺度︰「我唔會畀其他人影響自己嘅目標同底線，我覺得依家已經好性感喇！」
禁足書展大感無奈
對於貿發局禁止o靚模在書展宣傳，惹起模界廣泛爭議，汀叮直言「禁足令」影響不大，並透露將會在海港城舉行簽名會宣傳︰「出寫真係佢哋嘅夢想，冇得近距離接觸Fans，我都明白佢哋嘅無奈。」談到黃秋生的「模妓女論」，她強調自己並非o靚模，故不會對號入座︰「唔會畀呢啲嘢影響心情，我會喺其他方面做好啲！」
聞師姐緋聞即扮傻
入行至今，汀叮給人的印象總離不開「Angelababy師妹」，但她並不介意︰「起碼有人記得我係邊個！不過梗係想好似Baby咁紅啦！我會視佢為奮鬥目標！」有感模特兒生涯短暫的她，希望有機會嘗試不同類型的工作︰「想出外闖吓！希望得到更多機會，其實Baby可以話係我嘅原動力，好欣賞佢對事業嘅執着。」她透露與Baby老友鬼鬼，對方更經常分享模界心得︰「佢會鼓勵我，私底下大家咩都講。」被問到Baby與黃曉明的緋聞時，汀叮立即扮傻及扯開話題，認真夠義氣！