本文重點
不諳中文並經常以英語受訪的樂基兒，為力撐老公黎明（Leon），不惜為其金句向傳媒解畫，兩夫婦更口徑一致，指若有不明白的地方可詢問他們，夫唱婦隨！
樂基兒（Gaile）昨日以一身閃令令打扮出席《BMW研發綠色技術為地球打氣》活動，場內擺放一架嶄新的環保概念車。她表示平日愛遊車河兜風，更自言是環保之人：「我平時鍾意自己買餸煮飯，倒垃圾嗰陣又會將佢哋分門別類。」
撐老公有大道理
問到夏天來臨有何活動？熱愛陽光的Gaile笑說：「通常會玩水上活動，例如滑水咁啦！（同邊個玩？）同幾個女仔囉！（點解唔同Leon玩？）我哋不嬲都唔會一齊做運動o架喎！大家各有各做。」
談到Leon又爆出金句，Gaile即力撐老公：「其實佢講嘅嘢有佢嘅大道理。（你聽得明？）咁都要用時間慢慢了解，可能大家平時冇乜時間去了解，但我就有時間，所以佢講嘅嘢，我都明白。」提到早前Leon的「連體嬰」金句，她笑說：「佢有同我解釋過，我明白，我覺得佢講得好啱。（佢點解釋？）因為我中文唔好，所以佢會用簡單嘅中文解釋我聽，如果大家以後有乜嘢唔明白，可以嚟問我！」
此外，Leon前晚在上海出席Ermenegildo Zegna一百周年慶典，獲品牌家族第四代成員Anna Zegna熱情款待，並獲贈以皮套包裝的高科技IC Card入場券，凸顯尊貴身份。