我小小So早前喺機場撞到諸葛梓岐，佢話呢排四圍飛，早排曾去日本公幹返港，問佢有冇瘋狂購物，諸葛話冇時間之餘，屋企啲衫仲多到着唔晒，仲同小小So講，如果唔介意着舊衫，可以隨時去佢屋企攞，因為每季佢啲朋友都會推篋去佢屋企攞衫！
小小So：你成日去日本工作，會唔會碌爆卡？
諸葛梓岐：我每次都去幾日，來去匆匆，邊有時間Shopping！
小小So：咁咪可以幫你慳錢兼儲到錢？
諸葛梓岐：梗係唔會，我每次去歐美旅行都會瘋狂購物，一鋪清袋。
小小So：吓！咁香港呢？
諸葛梓岐：我唔會喺香港買衫，因為有時喺時裝雜誌睇到鍾意嘅衫，香港都冇入，而且我又唔鍾意同人撞衫。
小小So：話時話，我每次見你都着唔同嘅衫，你屋企係咪好多衫o架?
諸葛梓岐：多到着唔晒，好多時着一次就唔着！
小小So：咁嘥！
諸葛梓岐：係呀！你啱唔啱呀？如果唔介意，你都可以去我屋企睇吓有乜衫鍾意，我有啲朋友都會不時推篋去我屋企攞衫走。