藝人出盡心思拍寫真，當然希望入會展跟Fans分享成果，就算半路殺出攔路虎，都紛紛出奇招搶灘，實行潛入書展跟貿發局打游擊！繼周秀娜、Donut及Yumi（尹蓁晞）事先張揚會踩場後，Annie G.及Hailey C.組成的MonsterBeez更寸爆表示會日日「踩場」，當貿發局冇到：「到時會日日都去，日日玩捉迷藏！我哋會捐窿捐罅執平嘢！（怕唔怕混亂？）未見過書展有秩序過，除咗收舖嗰陣！上年試過喺書展搵阿媽搵咗兩個鐘！（着乜衫？）着乜都好，一定唔會着比堅尼跳嚟跳去！」
而「浸大E神」楊梓瑤（Carol）更明刀明槍入書展幫手賣寫真：「到時會着背心短褲去，不過都驚多人逼親，公司會安排保安。」她亦相當識走法律罅，雖然不會簽書，但就會幫手賣書：「佢話唔畀我簽書！冇話唔畀我賣書啫！我仲會送親筆簽名海報畀頭一百個Fans，睇吓到時撞唔撞到我啦！」
Evelyn邀Fans合照
另外，今年將推出寫真的其他o靚模都會諗計潛入書展，A. Lin（裴殷）及DaDa Lo（盧頌之）組成的SugarBeez屆時會着水手服現身：「啲人愈唔畀就愈要去！香港又唔係封建城市，着水手服係切合番寫真主題，睇吓到時呃唔呃到學生飛入場！」在寫真中大賣純情的蔡穎恩（Evelyn）及陳嘉寶（Anjaylia）亦於本月23日下午二時至三時於寫真櫃位跟Fans見面：「得閒都會去睇吓其他書，會同啲Fans影相、合照，但就唔會簽名。」Jessica C.今年第一次推出寫真，她希望以普通市民身份進場：「會同公司商量，經理人講過曾經有女藝人被非禮，我擔心安全問題，第一次出寫真好想睇吓現場係點，又想同Fans接觸。（被Fans要求會否簽名？）都會簽！」
貿發局表示關注
對於眾o靚模殺入會展的各式奇招，貿發局方面都顯得束手無策！發言人張先生接受訪問時說：「書展係開放嘅，任何人士作為觀眾都有權入場，當然一定會關注，因為人流咁多，我哋都要控制秩序，但關注唔表示會禁制佢哋，希望任何人士入到書展都守規矩，（衣着方面？）呢樣嘢都冇規定。」對於Chrissie在會展另一場地簽名，他說：「個別情況唔作評論，亦都無謂幫佢宣傳。」
Carol
日期：7月21日至22日
奇招：幫手賣書、送親筆簽名海報給頭100名Fans
Evelyn、Anjaylia
日期：7月23日
奇招：於寫真櫃位跟Fans合照
MonsterBeez
日期：書展期間每一日
奇招：捐窿捐罅跟貿發局玩捉迷藏
Jessica C.
日期：書展期間
奇招：與Fans合照及簽名，來者不拒