近年在內地拍劇及登台的Yumiko，狂賺人仔，而她逗留內地期間，甚少時間血拚加上理財有方，故愈儲愈多錢，成為圈中小富婆。湊巧好姊妹容祖兒和鍾欣桐（阿嬌），早前分別豪擲逾2千萬元購入西環海景豪宅！而Yumiko被指與緋聞化妝師男友租住6萬元西貢豪宅，未知是否豪宅曝光，故加快了她做業主的決心。

放大圖片	Yumiko邊行邊講電話，未知是否向緋聞男友諮詢買樓的意見？

問保安攞料　講電話密斟

日前Yumiko以型女打扮現身尖沙咀，到千萬摩天豪宅「名鑄」視察，只見她做足功課，又不時講電話密斟兼向保安員問長問短。其後，Yumiko進入豪宅內左望右望，逗留一會兒後才離開，還用手機拍低豪宅大堂的外貌。

到豪宅打了「白鴿轉」後，Yumiko到專賣潮流產品的商場「gi」風騷Shopping。未知是否因在內地工作無暇購物，對愛血拚的她來說，相當難受。當她到了商場後便瘋狂掃貨，對香薰情有獨鍾的她，試了不同味道，索完再索，相當入神。其後，她看了飾物、精品及家居擺設等。期間，Yumiko發現趣致的小玩意即拿起來把玩，愛不釋手，豈料她「蝦碌」地弄跌小玩意，惟有尷尬拾起，並到櫃位付款。

逛街後，Yumiko飲涼茶解渴。	Yumiko，不停索完又索試味。	Yumiko不慎將小玩意弄跌，蝦碌連場。

學祖兒阿嬌　買樓當保值

經過一輪衝鋒陷陣後，Yumiko到附近小食店買雞蛋仔及辣魚蛋醫肚，只見她吃得滋味，並與店員有說有笑。雖然當天下大雨，但仍不減Yumiko的興致，她再逛另一間香薰專門店，可惜沒有收穫。

對於睇豪宅一事，Yumiko說：「買樓比較保值，Mani（霍汶希）都叫我買樓。嗰日都係行過望吓，嗰度確實幾靚。」問到是否羨慕祖兒和阿嬌？她笑說：「戥佢哋開心，我都想問公司睇吓有冇優惠價，當員工福利，買生不如買熟。（買嘢跌落地？）係囉！自己論盡，但冇跌爛，最後我都買埋添！（鍾情香薰？）係呀！我買咗白蘭花味嘅香薰，諗住擺喺睡房或者洗手間。」