小小So：Him，你有乜冧功追女仔橋㗎？

Him：好簡單，最緊要當自己係工人，當正女朋友係出糧畀你嘅「事頭婆」咁，我會為女朋友拖地、煮飯、做晒所有家務，女朋友淨係歎世界就得。

小小So：就係咁簡單？

Him：我仲會幫女朋友搽Lotion，手手、腳腳、連背脊都幫手搽埋，女仔好鍾意搽Lotion㗎！

小小So：嘩，咁你咪攞正牌摸勻女友全身喎？

Him：又唔會咁諗，因為拍咗咁耐拖，都唔會有博唔博懵嘅問題。

小小So：咁依家有冇拍拖呀？

Him：冇呀！不過有目標，都係圈中人，但唔好講邊個喇！對方未同我合作過嘅。

小小So：咁你同緋聞女友黃智雯係咩關係？

Him：朋友啦！我講嗰個唔係佢。其實我想努力賺多啲錢，因為啲人成日覺得做呢行嘅男仔冇乜安全感。

小小So：咁有乜投資心得呀？

Him：我諗住投資的士牌，同幾個朋友夾份，咁就唔使拎咁多錢出嚟，又可以減少投資風險。