對於被紫藤炮轟侮辱女性,黃秋生無名火起,逐點還擊:「我冇歧視妓女,絕對支持性工作者爭取權益,我叫周秀娜搵紫藤,係因為有o靚模話要搵平等機會委員會投訴,佢哋以為咁做好恰當,咁不如去搵紫藤,因為性服務好廣泛,包括意識,唔使一定要上床。我提到妓女,係指妓女上街遊行都唔會殺入屋邨派傳單,希望大家搞清楚我講乜先!其實o靚模畀人撕爛件衫、噴濕自己、擒高擒低、擘一字馬就唔係侮辱女性?有啲組織會唔會太敏感?不如先搞清楚我講嘅內容。」
此外,秋生又再插o靚模:「我講嘅係個個人都可以有自己生存空間,但要搵個恰當地方進行,佢哋千方百計搞完一樣又一樣,諗住入書展,仲上網去話人打壓你,唔好成日話呢種係販賣青春,青春唔係單指胴體,佢哋咁做根本就係冇青只有春!」問到為何針對周秀娜?他說:「我睇報道佢係度橋,係帶頭角色囉!」