黃秋生大鬧o靚模似「妓女入屋邨」,被性工作者組織紫藤直斥侮辱女性,秋生即反擊表示絕無歧視妓女!為捍衞女性尊嚴,周秀娜與舒淇聯手還擊秋生!
今年o靚模被禁在書展搞簽名會,即千方百計諗計混入會場,卻被黃秋生狂踩群妖亂舞,指若她們成功入書展就等於「妓女入屋邨」!這番「妓女論」不但辣o靚模,連性工作者也被拖落水,結果被性工作者組織紫藤直斥他是「一言堂」,言論對女性極之侮辱!
o靚模冇提供性服務
紫藤發言人吳小姐說:「秋生言論反映社會對『姐仔』嘅污衊,咁講好唔啱,希望佢唔好再攻擊女性!唔好用咁嘅說話話人。其實做『姐仔』喺香港係合法,佢哋都有自尊,唔好擺佢哋上枱,佢冇諗過呢行做乜嘢就咁樣講,不如嚟做吓義工同聽吓Talk先啦!」紫藤又為o靚模平反:「o靚模同『姐仔』唔同,起碼佢哋唔使提供性服務,唔使拉埋一齊講,港姐都有着比堅尼啦!咁係咪針對o靚模呢?」
對於秋生再指名道姓開火大鬧模「冇青只有春」,火滾到頂點的周秀娜(Chrissie)即叫秋生放下有色眼鏡,她說:「我對於呢位前輩所講嘅說話唔作回應,原因係因為我覺得嗰個前輩開口埋口都以妓女嚟形容一班剛剛入行嘅新人,我覺得冇必要對佢嘅說話作出任何回應,等佢放低咗有色眼鏡睇人先至再講。呢一次係我入行第一次,亦係唯一一次,我想代表被標籤模嘅女仔講嘢。」
許冠文:唔色情!
對於秋生的言論,曾拍過寫真的舒淇感受甚深,更與Chrissie連成一線反擊好友秋生:「自拍強姦之類宣傳當然唔好,但一班o靚模各出奇謀出位,喺愈來愈開放嘅社會,手法並冇唔妥,一切屬見仁見智。其實我同Chrissie合作過《全城戒備》,佢又靚又索,係男嘅都想睇,女嘅又想表露身材,一舉兩得!」
另外,許冠文出席好友新書發布會時力撐o靚模:「其實寫真冇乜問題,只係影相咁解,我睇過啲相都唔係好色情,我覺得只係有人斷章取義,好似出攬枕咁,都唔係色情,反而覺得好Cute,好似Snoopy咁!」而馬詩慧則說:「秋生又唔使去到咁盡,但o靚模行為真係會對青少年有影響!」



