近年唱片業嚴重萎縮，不少唱片公司走上「執笠」絕路，昨日本報收到可靠消息，盛傳徐子珊及可嵐所屬的恒藝亞洲已暫停唱片部運作，令徐子珊歌手前路出現暗湧！
無綫花旦徐子珊09年初加入樂壇成為恒藝亞洲旗下女歌手，同年9月推出處女EP《Kiss Me Kate》。去年底的樂壇頒獎禮上，子珊勇奪樂壇多個新人獎項，更奪得09年度《IFPI唱片銷量頒獎典禮》之「最暢銷本地新人」，成績不俗，可惜近日傳出唱片公司暫停唱片部運作，令子珊歌手夢被迫叫停。
可嵐變「孤兒女」
另一受影響的女歌手可嵐則於08年加盟恒藝亞洲，同年9月推出首張EP《女生不哭》，她亦曾憑歌曲《安全感》奪得《第二十屆CASH流行創作大賽》創作大獎。
據悉前晚恒藝亞洲唱片部宣傳人員已接到公司解散唱片部通知，徐子珊及可嵐頓變「孤兒女」，記者向唱片公司高層求證，對方說：「係咩？你邊度聽番嚟？我唔方便講！」隨即匆匆收線。記者再向公司揸Fit人張德貴查詢，問到公司是否暫停唱片部運作？他隱晦地說：「可能係亦可能唔係，公司進行緊重組！（對歌手有影響？）唔會，公司歌手唔多，下星期開會先知決定。」
下月赴外地進修
而子珊經理人所屬的無綫製作資源部總監樂易玲昨晚接受本報查詢時，透露：「子珊喺五月底已經同唱片公司完咗約，之前佢哋約過我哋出嚟傾，透露仲有好多計劃，只係欠缺一個資深策劃人去推行業務，我仲介紹人畀佢。今次我唔相信佢哋停止運作，相信只係重組，佢哋資金好雄厚。（子珊今年唔出碟影響大唔大？）對佢冇影響，因為佢要拍劇同電影，8至10月又會去唔同國家進修唱歌跳舞！」樂易玲表示不心急為子珊出碟：「佢唔使操之過急，因為新人出第二張碟要維持成績好難，唔想行錯，而且恒藝亞洲對子珊及無綫一、兩位藝人亦有興趣，等佢哋搵到人先再傾合作，子珊暫時唔會再簽其他公司！」
至於可嵐則表示沒收到公司通知暫停運作，她表示會致電公司查詢，亦不擔心個人前途問題，她說：「我同公司仲有好長合約，不過如果係都冇辦法，惟有逆來順受！」