當年Neway大少薛世恒為家族旗下的星娛樂做開荒牛，不過二少薛嘉麟日漸得寵，近年更成為Neway卡拉OK及星娛樂的揸弗人，令兄弟間身邊的兩個女人陳法拉及諸葛梓岐勢成水火！盛傳失勢的薛世恒，據知最近已另起爐灶，揼本成立「星煥國際有限公司」，邀得心腹何哲圖（前Neway高層）掌舵，捧「老婆」法拉做一姐圓歌星夢！

何哲圖（左一）曾効力Neway，現有傳跟薛世恒（右一）另起爐灶捧法拉。資料圖片

樂易玲（左）昨日開生日會，愛將法拉自然親身到賀。

何哲圖認曾試音

一直盛傳法拉希望出碟，原以為有「老公」撐腰，可揮低胡杏兒及未簽約Neway的諸葛梓岐做一姐，當時仍為Neway効力的何哲圖還親自傾約，令她出碟幾乎成事！可惜萬事俱備，卻臨門撻Q！Neway突然人事有變，改由二少執掌，薛嘉麟堅拒簽法拉，令她的歌星夢成泡影！不過法拉絕處逢生，據知薛世恒有份投資的「星煥」已落實簽法拉，而薛家亦得知此事，並會為法拉10月出碟，趕及角逐樂壇頒獎禮的新人獎。

鄭欣宜有望加盟「星煥」，關心妍則已落實簽約。(資料圖片)

放大圖片

對於簽約「星煥」，法拉透過經理人說：「之前係有見過Herman（何哲圖），好開心可以同佢見面，但傾唔傾得成都要睇公司！我好希望唔只做戲，亦可以唱歌！」而何哲圖亦大讚法拉：「係有見過面，係咪簽約要落實先知！我聽過佢錄音，感覺相當好，好尊重音樂！我揀歌手好嚴格，特別着重唱歌投入、聲線、態度同性格，法拉真係好鍾意音樂，對音樂百分百投入！（幕後大老闆係咪薛世恒？）絕對唔係，不過佢係香港人！」

關心妍落實加盟

除了法拉外，「星煥」已落實簽約關心妍及新人吳若希，據知更有意簽欣宜，而欣宜的經理人陳淑芬說：「係傾過好多次，大家都有意合作，不過仲未簽約！」