出名傻大姐嘅官恩娜（Ella），圈中人緣唔錯，有次小小So見到佢同唐寧一齊，原來佢哋早排因合作拍劇而認識，雖然有一段時間冇聯絡，但見番面即刻雞啄唔斷！女人嘅話題離唔開纖體同扮靚，唐寧一見Ella即大叫：「嘩！乜你高咗咁多？」着住波鞋嘅唐寧跳紮紮咁行埋Ella身邊，高人大半個頭嘅Ella就笑住解釋：「梗係啦！我着咗一對5吋高嘅船底鞋，成個人拉長咗，自信都多啲！」
笑完一輪，輪到Ella讚唐寧個新髮型好靚，仲伸手撥弄唐寧嘅秀髮，但發現係「假嘢」，唐寧話：「我本身頭髮好短，不過為拍廣告專登駁長，髮型師原本幫我駁長到胸前，搞到個樣好似十八、九歲咁，自己都頂唔順，最後剪到及肩就算！」傾傾吓，Ella仲提番唐寧N年前做童星拍過嘅廣告，發現兩個人原來已經入咗行一段時間，好彩佢哋都係性格開朗樂天嘅人，仲不失童真，臨走前仲學o靚模咁用手機玩自拍。