每位歌手都應該有自己專屬的咪高峰及耳筒，醉心音樂的麥浚龍（Juno），無論在台上演唱或錄音，都會用他的專屬系列，他說：「我最鍾意喺錄音室內聽歌，嗰種原汁原味嘅版本好好，燒錄咗喺CD嘅版本已經冇咁好，如果遲啲轉晒Download嘅話，質素又會再差好多。」問到如何分辨耳筒的好壞，Juno坦言重視品質多於外形：「個人偏好肥嘅嘢，安全感會大啲，但個樣靚唔靚係其次，最緊要啲聲靚唔靚！」他透露個人喜好是低音較重的耳筒。

放大圖片	鍾情「大大件」物件的Juno，獨愛巨型Headset。

偏愛低音夠重

Juno大力推介來自美國的耳筒品牌Monster，愛其低音夠重：「啲聲做得好靚，個款又好靚，戴住聽歌好舒服。呢個牌子嘅老闆Noel Lee之前做電線，所以佢嘅品質好有保證，我向來係呢個品牌嘅用家，遲啲又係合作夥伴，老闆又好鍾意車，所以大家好好傾。」

喜獲珍藏限量版

鍾情「大大件」物件的Juno，選擇耳筒方面亦專門挑選巨型Headset：「試過用普通耳筒，但鍾意大隻嘅Headset多啲，最後Noel送咗個限量版嘅Headphone畀我，好珍貴，因為出邊冇得賣。」耳筒以白色為主加上流線型設計，難怪深得Juno歡心，他表示已沿用該品牌的耳筒2年，家中有五個不同顏色：「其中有個仲係法拉利紅色，我最鍾意！」

鑑聽式耳機添立體感

耳筒通常分為6大類，包括收音機專用型、電視機專用型、CD機專用型、AV專用型、專業用型及通用型，其中專業用型即鑑聽式耳機，便是在錄音室內使用，方便歌手及錄音室工程師，從左、右耳機分辨不同的聲音，令音樂錄製出來有立體的感覺。