做人要勤力，但更要食腦，否則人與耕田牛有甚麼分別？靠把口搵食的森美和小儀，勤力而且食腦，再加上有創意，多年來均是大受年輕聽眾歡迎的電台主持人，近年他們撈過界，演舞台劇、電影、任電視台主持、拍廣告、搞棟篤笑、寫劇本和出食譜。今時今日森美、小儀做騷配音身價逐粒字計錢，名副其實「金句王」！
真名梁志健、今年37歲的森美十年前遇到阮小儀，「道理王」森美經常在節目中狂窒「傻大姐」小儀，聽眾經常不忿為小儀平反，愈鬧愈受歡迎，現實生活中，他們「恩愛」非常，森美笑說：「我老竇曾經靜靜問我係咪同小儀……我答佢係呀，仲叫佢守秘密添！」老竇都玩，森美真不怕雷公劈。他又自認是多嘴仔，經常駁嘴：「由細到大，阿媽話我死剩把口，打我鬧我，我竟然駁嘴：『你冇資格打我！』佢問點解？我話：『只有神先至有資格！』佢窒一窒，之後梗係加刑啦！」森媽媽曾經以為多嘴森美長大會做律師，結果他不是律師，而是唱片騎師，同樣是靠把口搵食。
中四的第一次
森美回憶第一次公開演說，是中四參加聯校科學展覽，當時沒有人夠膽站出來介紹設計出來的東西，他突然鼓起勇氣向展覽館所有人講解，就連同學和老師都大表驚訝。之後，森美開始靠把口搵錢，第一份工是補習老師，他說：「因為我喺學校人氣好勁，讀書成績幾好，仲要係領袖生，補習費收多啲。當時我發現，最聰明地方唔係講得多，而係講得精，我做補習時同一時間有六個中三、四嘅學生，每人百五蚊，我講到咁上下就叫佢自己做功課。」森美笑言早知當初開補習社，有信心成為第一代補習天王。之後他做過問卷調查員，同樣靠口才說服住戶接受訪問換取酬勞。
努力改善弱點
入行後，森美自覺最失敗一次就是為成龍的記者會做司儀，他說：「因為現場好多海外歌迷，講廣東話嘅人好少，要講廣東話、普通話同英文。點知當我揸住個咪嘅時候先至發現，我唔掂，因為唔識講普通話，連英文都有問題，好大挫敗感！」雖然當時成龍經理人陳自強執手尾，記者會順利完成，但森美發現：「原來口才幾叻都冇用，語言唔通亦都冇用，呢件事之後立即去報讀普通話同英語，依家英語做司儀冇問題，但普通話真係唔得，我嘅語言能力真係好低。」至於06年森美在電台節目《架勢堂》發起聽眾投選「我最想非禮的香港女藝人」惹起公憤，他說：「呢次唔係挫折，係『做錯事』，可以改過，唔好再犯就得啦！但成龍記者會上，我『力有不逮』心靈創傷好嚴重。」
靠講氹人開心
至於性格八妹仔的小儀，偶像是林珊珊，但沒有膽量，她說：「我讀書時曾經參加辯論學會，但返咗兩堂就冇再參加，怕醜，亦從未演講過，最怕喺好多人面前騷自己。N年前為咗考入理工，面試時硬着頭皮表達自己，已經係最大勇氣。」第一次靠把口搵食，是大學時代第一份暑期工，她說：「當年喺水晶店賣飾物，為咗開單，硬住頭皮向闊太大讚特讚，結果唔止成功賣出貨品，仲氹得客人好開心。之後亦曾經教過小朋友畫畫同屋邨診所做助護，都係用說話氹人開心。」
成為DJ後變成幕前，小儀終於發現說話除了氹人開心外，亦可以成為「金」句，她說：「因為『森美小儀』愈嚟愈紅，吸納咗好多Fans，連身價都高咗，曾經有廣告公司要求我只係講咗兩個字『真嘅？』咁就袋咗四位數字酬勞啦！」身旁的森美更是「金句王」，個半小時的演講或是20分鐘棟篤笑，酬勞高達六位數字，說到底，森美最希望都是重操故業做老師，他說：「我夢想開一間學校『教讀書』，因為學校教知識，補習老師貼題目，我就教人讀書要用好『方法』。」至於小儀的夢想是相夫教子，做個好老婆啦！
舞台劇玩創意
十年前因為有贊助商支持，森美小儀奉命召集了一批中學生合演舞台劇，經歷十年，曾經以屋邨、愛情故事、鬼古、馬戲團、歌劇和古裝劇等做主題，今年他們以芭蕾舞Crossover監獄作為故事主題，森美說：「現代人將自己封鎖住，生活變成監獄困死自己，例如我哋覺得自己係DJ，就唔敢做其他嘢，其實只係畀腦袋監禁。故事就係講一班人喺監倉裏面嘅人，點樣打開自己嘅創意，擁有真正生命。」小儀坦言曾經天真地希望邀請所有合作過的「小演員」參與十周年舞台劇，可惜現實不容許，她說：「佢哋個個都有正職，有啲真係做咗舞台劇，變埋老戲骨。」
後記：即興開Talk
森美小儀「自動波」火速完成訪問．結束後，眾人收拾細軟，森美不經意地說：「尋日我同個仔睇電視見到火山爆發，佢問點解會咁，我就話因為好耐之前，宇宙裏幾個含不同物質既東西撞埋一齊，變成最雛形的地球，然後再有一大舊磁石撞埋……」滔滔不絕，全場二十幾人停晒手，O晒嘴．梁Sir講完，全場拍掌，講足十分鐘，「金句王」袋錢入我袋呀！