Helen笑言幕前癲喪度已算收斂：「只係我平時嘅十分一咋，啲Friend都話我喺入面好斯文。我覺得自己唔算另類，只係唔理世俗眼光做番自己，為自己而活。」巴黎聖心大教堂外彈結他乞錢、伍詠薇上身在巴黎鐵塔前唱《失落於巴黎鐵塔下》、北京長城上舞醒獅，以噴飯方式介紹傳統旅遊點，觀眾睇得過癮之餘，她亦得已滿足私欲：「所有橋都係為自己開心而做，當然去到邊都難免惹人注目閒言，但一嚟我唔怕醜，二嚟係拍緊嘢，我唔會介意。」對她來說玩樂大過天：「我真係好鍾意玩，阿媽話我冇危機感，咁我唔知自己幾時死，可能聽日會死，咁梗係滿足自己、做自己鍾意嘅嘢先啦！況且依家我冇乜嘢要擔憂，所以開心行先！」
鏡頭前瘋癲享受人生，大啖美食、豪掃靚衫，但老土都要講句，鏡頭後的辛酸不足為外人道。Helen與幾位「戰友」一手包辦資料搜集、拍片、剪片等前中後期製作，巴黎十集節目，單是搵料已耗時兩個月。而為免令觀眾掃興，負面情緒亦要收收埋埋，她說：「好似之前去東京拍嘢，都會忟憎，因為太熟嗰度，自己覺得悶都係要扮新鮮咁介紹。」
與超儀夾Band
巴黎十五日之行時間表排得密麻麻，谷得辛苦，她更因為天氣問題皮膚敏感出濕疹，不過竟然可以將買藥膏一事變為幕後花絮，令人甘拜下風！之前她在北京亦因食物太辣肚屙，果然有苦自知。有指她現在包拍一集節目收70萬，她說：「冇咁多！可以話之前喺日本連租車錢都唔夠，依家負擔得起囉！」雖然進帳暴升，她卻認真指銀行戶口長期維持最低點$0：「真係o架！我喺節目掃貨真係自己畀，唔係電視台畀o架！總之依家務求收支平衡，啱啱夠找卡數就OK！」
Helen曾參與電影《大佬愛美麗》劇本創作，早前又客串《維多利亞壹號》，瓣數多多的她最近與多年好友何超儀及葉佩雯靜靜起革命，視搖滾如命的三人打算組Band「凍檸茶」：「其實有呢個Idea好多年，依家係進行中，寫咗啲歌，我哋係Just For Fun，冇打算踏入樂壇。至於『凍檸茶』呢個名，係想以草根態度侵入香港每個階層，你諗吓，香港無論幾有錢或者幾窮嘅人都會飲凍檸茶喎！」
男仔頭膽生毛
男仔頭的Helen自細已愛蝦蝦霸霸，讀BB班時因打男同學被罰留堂，碰巧運動天分奇高，正好用來發洩過度活躍的精力！她牙擦擦表示運動八項全能，不過數來數去只得六項：溜冰、排球、籃球、自由體操、游水、田徑，她說：「我可以連續八個鐘頭打波，由七點鐘返學到放學返屋企，我可以話係全職運動員，基本上唔使讀書。」提起運動她可以滔滔不絕，為霸球場打波可以從幾層樓高的課室掟書包落街：「當然唔係掟自己嗰個，係掟人哋嗰個，我呢啲醒目女嚟o架嘛！」有次學界比賽更以鐵頭功「鏗」暈對手，她興奮地說：「呢單真係好經典，我見住佢埋嚟先『鏗』落去嘅，最尾球證仲判佢阻人前進。」
15歲女玩出走
雖然母親是中國文學教師兼訓導主任，但絕不傳統封閉，Helen因為只顧玩運動被見家長：「班主任叫我攞番啲時間讀書，我阿媽話我運動有潛質，點解唔發展，仲講番班主任轉頭，真係服咗佢！」問到母親及父親（即資深傳媒人杜惠東）誰是好人、誰是醜人時，她調皮地說：「兩個都好錫我，阿媽惡少少，但係都逃不了畀我恰。」十五歲那年Helen被雙親送到加拿大讀書，開學前她拚死要獨自到日本一行，先斬後奏訂機票及酒店，母親到最後還是被降服出手為她兌換日圓。
夠膽愛不敢恨
Helen先後在加拿大及日本留學，又曾在多個國家拍攝旅遊特輯，加上大癲大肺性格應該不缺異地戀吧？她說：「拍嘢因為太趕冇乜嘢可以發生，咁日本我住咁多年梗有嘅！想日文上手快梗係要識日本人，大家言語不通佢焗住教你囉！同埋講電話係可以學得最快嘅，因為冇身體語言幫手。」
Helen性格爽朗，感覺她在愛情上是個敢愛敢恨的人，不過她明言：「我敢愛不敢恨，我唔記仇，嬲一日第日就冇事，可以放得低。我同所有前度都做得番好朋友，完全唔會尷尬。」她又直言自己不是早熟的人，整個中學時代都「清純到極點」：「中學真係完全冇拍拖，我係波牛嚟，愛情就係籃球。」
後記：書展通殺
Helen一方面為英國之行作準備，一方面籌備將於書展推出的新書：「其實係本散文集，會收錄我嘅專欄文章，講衣食住行人生觀，立立雜雜乜都有，咪叫佢『通勝』囉！其實應該叫『通殺』！」