多倫多華裔小姐、寰宇新人倪晨曦（Elva）曾在06年華裔小姐中奪「完美體態」獎，想不到身材Fit爆的她原來十分為食，在多倫多留學期間，她經常相約幾個同學仔四出覓食，在眾多菜式中，她特別鍾情墨西哥菜。
今年Elva決定留港發展，在朋友介紹下到一間由地道墨西哥廚師當顧問的墨西哥餐廳開餐，店內以布滿仙人掌的壁畫為題，營造沙漠熱辣辣的氣氛，她說：「墨西哥菜最大特色係醬料多，味道有辣有酸，完全刺激到你嘅味覺。」
Elva表示最愛吃牛肉鐵板：「鐵板可保持牛肉嘅熱度，廚師好有心思，鐵板下面係用嚟載住薄餎餅，加上黑豆醬、莎莎醬、牛油果醬同酸忌廉醬任君選擇，我鍾意牛油果醬，酸酸甜甜好開胃。」
她還教路食薄餎餅心得：「以前有朋友教我，要先將餡料放喺薄餅中間，其中一個角摺向前，然後左右摺埋形成一個兜，餡料就唔易流出。」