入行2年的何尚謙（James）緋聞不少，除與性感女神舒淇在拍攝《全城戒備》期間傳過緋聞外，更與「邦民女」羅凱珊（Kama）撻着，可惜去年底有傳Kama搭上富家子而分手，受盡情傷的James最近似乎走出陰霾，早前因拍攝廣告而認識陶喆前緋聞女友岑潔儀（Zoey），二人一拍即合火速撻着！

捉實手仔 James身有痛腳，Zoey充當人肉拐杖都不為過，但捉實手仔又似乎親密過頭！

人肉按摩 James睇腳傷期間，Zoey無厘頭為他按肩，莫非想分散痛楚？

James最近因打籃球而傷韌帶，目前仍需睇跌打，日前他相約Zoey覆診兼開餐。當日仍以紗布包實腳踭的James，與Zoey同樣着粉色系列情侶裝，先在旺角某大型快餐店開餐。除了由Zoey負責點餐外，他們更一籃雞兩份分，期間她突然一手搶去James手上的雞胸，原來提醒對方戒口，更親手搣去雞皮及餵食，認真細心！

「攞景」贈興 James痛到面容扭曲，Zoey竟拍照「攞景」！

攬住睇樓 睇完醫生，二人還攬住睇樓盤，充分利用時間。

飲飽食醉後，二人返回大街人群堆，未知是否人流太多，他們刻意保持距離，直至走入較冷清的街口才放下戒備，James索性搭住Zoey膊頭借力，Zoey亦順勢緊箍男方的腰，藉扮人肉拐杖而十指緊扣！隨後他們步入跌打醫館，相信是James為腳傷覆診，小情人邊睇症邊談情，當住跌打師傅面前打情罵俏！Zoey更不時為男友撥頭髮、按摩及抹汗。當醫師講述James傷勢時，Zoey擔心得面色一沉，James即搭其膊頭安慰，最後Zoey更為男友付診金，「親密關係」不言而喻！

James（中）去年因與舒淇合作而傳出緋聞。資料圖片

Zoey餵James食雞，認真細心！

不禁讚完又讚

事後記者致電已赴泰國拍攝電影《完美童話》的James，雖然例牌否認緋聞，但仍不禁大讚Zoey：「佢特登介紹個好醫師畀我，陪我去睇啫！（搭晒膊頭喎？）佢禮貌扶我啫！（幫你搣雞皮？）佢細心啫！」他透露擇偶最緊要專一，似乎仍為上一段情耿耿於懷。至於Zoey亦強調二人純屬朋友，更否認為怕男友介意才收起性感：「我同佢係好朋友！」