鄧麗欣（Stephy）為讓歌迷有新鮮感，今年改走跳唱路線，偏偏宿敵傅穎（Theresa）亦以性感姿態闖「舞」林！問到可擔心比較？Stephy表示未有機會看對方舞姿，更不會比較：「總之我會努力練好啲舞，跳舞唔係跳一、兩日就會跳得好，需要時間落苦功先會有成果！排舞老師唔會因為見我係女仔就有特別優待，所以係練得幾辛苦o架！」

問到舞步有幾難？Stephy說：「對我嚟講，最難係着住對5吋高踭鞋跳舞！我都好想做得到，平時着高踭鞋行路就OK，不過跳舞係另一回事，所以喺屋企都着住對高踭鞋跑跑跳跳，等自己習慣吓！」

拒邀朋友返閨睇波

適逢世界盃開鑼，Stephy練舞之餘，不忘與一班朋友齊齊睇波，不過吸取上屆經驗，今年就謝絕朋友到香閨睇球賽：「通常大家都鍾意一路睇一路食零食，完場之後，就發現滿地都係薯片、花生殼同汽水罐咁，好似反轉咗間屋咁，真係咪搞啦！」