我小小So向來同Cara G.嘅模特兒男友Jesper好老友,嗰日小小So喺中環行街,竟然撞到Jesper,小小So開心到即刻走去同佢打招呼,之後仲一齊去歎Tea。佢一坐低就畀張卡片小小So,仲話今年會主力做攝影師添!
小小So:好耐冇見,最近點?
Jesper:除咗忙影相外,我最近同朋友合資開咗間Studio(影樓),兼做埋Production。
小小So:你講真㗎?
Jesper:我唔係講笑,開咗幾個月喇!我會負責影相。
小小So:你想轉行做攝影師?
Jesper:唔係,總之Model會照做,我兩份工都會兼顧。
小小So:點分身?
Jesper:你放心,我識分配時間,但間Studio話晒開咗冇幾耐,所以嚟緊一年,我會將七成時間做攝影師工作,餘下三成就做Model。
小小So:咁你咪冇時間陪女友囉?
Jesper:冇辦法,男人以工作為重,而且女友知我一向想做攝影師,所以好體諒我。不過,女友對我都好重要,我唔會顧住工作而冷落佢!