英皇電影《鎗王之王》導演爾冬陞（小寶）直言，古仔的角色有不少內心戲，甚具挑戰性，幸古仔能傾力配合。已非首度與古仔合作的小寶表示，大讚對方已脫離偶像派，但其寡言作風，不僅令拍檔李冰冰感到沒趣，連小寶亦笑他是悶蛋一名。他透露古仔與冰冰拍攝車廂戲的趣事：「我收到佢哋喺車廂嘅對話，根本完全唔啱Key！我聽聽吓都悶到轉台！古仔太慢熱，我都係《門徒》之後先同佢講多咗嘢，所以成日都覺得佢嘅性格唔適合做呢行！」
此外，曾揚言欲再跟張栢芝合作的小寶透露，雙方一直有接觸，但暫時未有定案，合作與否全視栢芝的決定。他又大讚栢芝具演戲天分：「好難拍到佢醜樣，就算係喊成點都冇問題！佢一埋位就好投入同自然，冇掩飾情緒，佢又唔太理自己個樣會點嗰喎！可能呢個係佢表現自然嘅最大原因！」