古天樂最近在英皇電影《鎗王之王》飾演一名射擊高手，拍攝前專誠花了個多月時間接受射擊訓練，讓古仔接觸真槍實彈，令自小收藏氣槍的他大感興奮。面對各式各樣的手槍，古仔坦言大開眼界：「第一次喺練靶場練射擊，左輪、曲尺應有盡有，全部任你試，幾開心，我屋企得嗰十把玩嘅槍，完全唔同感覺！」

雖然正式拍攝時以道具子彈代替，但古仔仍猶有餘悸：「假嘅都可以死得人！有場戲講我幻想打死個警察，結果佢哋向我開槍，拍嗰時加埋射我十幾槍，如果有咩意外我就死咗，外國演員都試過被假子彈射中而意外死亡，真係好擔心！」

與吳彥祖鬥智鬥力

數度與吳彥祖（Daniel）合作的古仔表示，以往與對方的對手戲不多，《鎗》片才算正式交鋒：「我同Daniel嘅角色唔需要太多溝通，慶幸同佢合作得多有默契。不過最緊要都係導演爾冬陞，佢要求好高同好嚴肅，搞到劇組人員個個都保持距離，咁就自然做到角色要求啦！」此外，李冰冰在《鎗》片中飾演古仔其中一位女友，他大讚冰冰較以往穩重，符合《鎗》片的女強人角色。