對於o靚被拒在書展搞簽名會，引起城中熱話，各人有不同反應，其中包括曾志偉、尹蓁晞（Yumi）、周秀娜、Annie G.、「E Cup Baby」劉欣宜和姜紫藍。
周秀娜：冇進步
「對我好唔公平，我真係唔知呢個顧問團係點樣形成？呢啲文化人冇嗰樣搞嗰樣，冇進步，愈來愈虛偽，我只係一個Model，想喺一年一次嘅書展，呢個咁嘅大平台發表自己嘅寫真集，依家就搞海陸空宣傳囉！」
曾志偉：怕太激
「今年冇出，就算有都係健康同益智！可能大會怕佢哋宣傳手法，舊年又嘔奶（派奶），怕佢哋太激囉！其實書展比較文學性，如果寫真混入咗怕人哋混淆，咁做都啱嘅。」
劉欣宜：好無奈
「我同李蘊都覺得好無奈，收到發行商通知，我本書唔係三級，係藝術性感，寫真喺外國好普遍，希望大會重新考慮，簽名會係提高人買書嘅動力，考慮去商場同夜店搞。」
尹蓁晞：冇影響
「原本想喺書展搞簽名會，但收到通知話除咗學術性書籍外，唔可以有其他簽名會。事件對我影響唔大，Fans會照買我本書，反而Fans同市民損失咗一個夏天嘅活動。」
姜紫藍：誓上訴
「封信話我本書意識不良，我好嬲，對我唔公平，一定上訴到底。我打過去平機會，佢哋唔接受職業歧視。我會喺6月30日前去貿發局畀佢哋再評審多一次，要據理力爭。」