丁子高自從同楊千嬅結婚之後，成日都畀人話佢「黐」老婆啲名氣同錢，為咗證明自己都好上進同有事業心，佢曾經話打算喺上海自資開公關公司做老闆。不過，日前喺街度見到丁子高，佢話呢個創業大計可能有變，原因離不開「情誼」兩個字！
小小So：你喺上海開公司嘅大計進展成點？
丁子高：可能要遲啲先搞喇！
小小So：點解？
丁子高：我年底要補擺喜酒，呢排忙緊搞結婚啲嘢，我都減緊肥，因為要着禮服。
小小So：只係為咗結婚而唔搞住？
丁子高：本來我想自己一個人搞，但我同依家嘅公關老闆關係好好，如果我唔做，自己一個出嚟搞，好似唔係咁好咁！
小小So：為咗情誼？
丁子高：都有少少啦！如果真係要喺上海搞公關，我或者會同依家嘅老闆夾份，感覺會好啲，又可以減低投資風險。
小小So：喺上海有冇搵到幫到手嘅人才？
丁子高：如果搞都要搵幾個同事去，因為我見過上海啲人，佢哋冇香港啲人咁進取，要花時間培訓，如果真係開公司，我諗我要搬返上海住，做老闆真係要親力親為至得！