李治廷、謝婷婷和貢米等昨日在星光大道李小龍銅像旁舉行新片《少年李小龍》啟動儀式，以李小龍打扮現身的李治廷，甫出場即向李小龍銅像鞠躬，他透露為配合角色，除戒口減吃澱粉質，改為吸取高蛋白質外，更練習自由搏擊、詠春及健身來鍛煉體形。雖已花了兩個月時間，但只能谷出六舊半腹肌，尚未達到李小龍的八舊腹肌健碩身形：「已經每日不停操，希望練到八舊先開工啦！」

小演員在片中飾演李小龍的弟弟。

謝婷婷（左）認為貢米不似阿嫂張栢芝。

唔覺貢米似阿嫂

談到片中與婷婷及貢米均有感情線，李治廷笑言尚未收到劇本最新發展，故未知親熱程度，當被取笑有可能奪婷婷銀幕初吻，他說：「嘩！唔識答，如果係段戲帶到都可以嘅！（咁要唔要同安志杰講？）……咁事前食香口膠囉！」

處女下海的婷婷透露片中有跳Cha Cha舞戲份，所以已積極練習，問到有否向父親謝賢偷師？她說：「唔得，佢亂咁嚟，不過佢跳牛仔舞好勁，亂得嚟都得，因為自己創作。（會唔會搵男友做舞伴一齊學？）依家諗緊啲好玩嘅一齊學囉！不過佢驚。」對於有機會獻出銀幕初吻，婷婷說：「應該唔會，冇安排。（同『翻版張栢芝』貢米合作，覺得似唔似你阿嫂？）呢兩日都有見阿嫂，好清楚佢個樣，但我覺得唔似。」

至於首度參與港片的貢米直言心情緊張：「要全廣東話對白。（驚唔驚講得唔準變粗口？）唔驚，到時會有人糾正。（婷婷話你唔似栢芝，會唔會失望？）其實我都覺得唔似。」