積極多元化發展嘅諸葛梓岐（Marie），近期除咗密鑼緊鼓籌備赴日發展外，又有傳佢將會簽約日本公司做歌手，實行做個「藝能模」！Marie早前仲為亞視大騷處女下海，夥拍金牌司儀張達明同谷德昭做司儀。開騷前，小小So專誠去咗探Marie班，只見忙住裝身嘅佢一袋二袋，又有假髮又有長裙，原來佢事前搵專人幫佢打造一個大方得體嘅形象，配合工作需要，果然一啲都唔馬虎！
雖然Marie當晚喺台上間中都有食吓螺絲同咬字唔正，但佢輕鬆同風趣嘅表達方法，得到影后鮑起靜（鮑姐）嘅賞識。完騷後，小小So喺休息室見到Marie同鮑姐密密斟，原來鮑姐對Marie嘅表現讚不絕口！連大會監製同一班行政人員都走去後台搵佢，點名話想同佢繼續合作，張達明同谷德昭都大讚佢表現淡定。得到咁多人認同，睇嚟Marie可以進軍司儀界喇！