內地小生黃曉明與o靚界女神Baby愛得辛苦，這段異地情一直受到保護，可是Baby千里飛到河北探曉明的一幕，億萬網民齊齊見證，兩位當事人很難再講大話！
Baby昨日到深圳出席《華娛六周年台慶暨十大亞洲紅人盛典》，接受訪問時，雖然沒再大話妹上身，不過依然把戀情埋藏心中，難怪化上一個完美妝容，仍遮蓋不住面上粒粒壓力瘡，而她更首度開腔承認與曉明「相處」中。
AB：Angelababy 記：記者
記：探班照傳出後心情點？
AB：心情一路都好好，忙出寫真！（笑晒）
記：係咪忙拍拖？
AB：唔可以回應！因為要保護我自己同我身邊嘅人，唔想孭炒作黑鑊！
擰頭拒「明嫂」稱號
記：依家叫你「明嫂」得唔得？
AB：（耍手擰頭）唔好啦！叫番我做Baby親切啲！（直接承認）同圈中人拍拖係好難嘅事，壓力好大，希望畀多啲空間我自己！
記：你哋成日微博傳情？
AB：其實真係冇乜點傳，有時都係媒體諗得太多，報紙寫「米扣扣」，其實佢係我一個好好嘅女性朋友，咁就惹嚟第二啲美麗遐想，引起誤會。
記：海綿蛋糕呢？
AB：（面有難色，無言以對）我唔識答！我唔想講佢個名啲嘢！（笑中帶無奈）
記：黃曉明個人點？
AB：（面紅紅）佢個人好真誠，經過相處後發現佢好好人，好識得保護身邊嘅人，冇大明星架子！
記：驚唔驚畀人話你係「大話Baby」？
AB：（繼續無奈，無言以對）唔識答，唔識得回應，我淨係會專注自己嘅工作！
決不放棄戀情
記：感情生活OK？
AB：我生活得好開心！
記：感情生活呢？
AB：唔講囉！費事畀人話炒作，總之唔講佢啲嘢！
記：好大壓力？
AB：真係好大壓力！但我嘅減壓方法就係唔睇所有雜誌。
記：有冇因為壓力而想放棄？
AB：（堅決直言）冇！因為我係一個好堅強嘅人，我會諗辦法紓緩壓力，好彩身邊有好多Fans支持，畀好多鼓勵我，心裏面好值得安慰！
記：Fans支持拍拖？
AB：佢哋好體諒，我都係一個人啫！
記：日本經理人有冇阻你拍拖？
AB：佢哋唔會理會，最緊要工作。
記：你係咪好黐身？
AB：冇回應。
記：你哋點維繫？成日飛來飛去好難維繫？
AB：我個個月都飛來飛去啦！
記：係咪曉明叫你唔好講，所以有口難言？
AB：唔係！只係想專注工作啫！
記：你去探班嘅事呢？
AB：冇回應。
記：曉明係咪介紹你畀陳凱歌識？
AB：我唔講佢嘅嘢喇！