譚小環與金融才俊老公蔡強榮恩愛非常,她不但無懼老公出軌,還「恩准」他(目及)女,但只限年逾40的中女!
(目及)女篇
問:忍唔忍受到老公成日(目及)女?
答:睇吓睇邊個啦,如果靚女梗係一齊(目及)!尤其係啲4、50歲、保養到好似30歲嘅女人。我見到靚女都會叫老公(目及)吓,不過性感模就一定唔准,要管制吓!
問:(目及)女鍾意(目及)咩部分?
答:我鍾意睇氣質,唔使太靚,要畀人健康感覺,好似妮歌潔曼咁,好高貴同吸引。
如果篇
問:假如喺出面見到閨中密友嘅男友有外遇,會唔會向朋友告狀?
答:告狀就唔會!但係會問吓佢最近感情生活點,提佢多啲關心男友,唔好拆散人哋!
問:如果發現剩番一個鐘頭命,你想做啲乜?
答:同親人同最錫嘅人一齊度過,好似老公、父母同家姐咁,大家靜靜哋傾訴心事,交低遺言。
問:你覺得死咗之後,會入土為安、上天堂、落地獄定係投胎再做另一個人?
答:我選擇投胎,再重新開始!呢世做女人,下世我想試吓做男人。做一個聰明同醒目嘅叻人,好似譚詠麟,年年25歲,永遠咁後生!
擇偶篇
問:覺得邊個男星最適合做老公?
答:周潤發。佢好有幽默感,同佢一齊唔會悶,個人又Nice,邊個階層嘅人都溝通到,大場面又應付到,做佢老婆真係好幸福!
問: 覺得邊個男星最適合做男朋友?
答:古天樂做男友都唔錯!幾靚仔,可以帶出嚟威,佢畀我感覺幾識氹女朋友,係一個好情人。
男人篇
問:最討厭嘅男人類型?
答:唔鍾意小家、樣樣都計較同孤寒嘅男人,一定要出得大場面同有紳士
風度。
問:最憎男人有啲乜壞習慣?
答:採礦(挖鼻屎)!好核突!好唔禮貌同唔合衞生,見到我會鄙視佢同睥
住佢!
問:如果有個有錢但係花心;有個冇事業但係忠心嘅男士追你,你會揀麵包定愛情?
答:可唔可以兩個都唔揀?揀唔落手!只有麵包冇乜用,有愛情冇上進心又唔好,我寧願兩個都唔要靠自己!