新八模之一的潮媽Mia與錢小豪及郭秀雲兒子錢景峰（Andrew）拍拖約半年，前晚各自在Facebook發放分手消息，但字裏行間依然流露愛意，難捨難離。Andrew曾透露除了受到不少壓力外，還有其他原因，令外界揣測是否遭媽咪反對。記者昨日就此事致電郭秀雲，她表示看報道後才知囝囝甩拖，仍未聯絡他了解情況：「我由頭到尾都唔需要重視呢段關係！呢個年紀拍拖當識多個朋友，多啲見識，到將來適婚年齡就會搵到適合對象。（佢哋仲好深愛大家？）唔知！可能一個東一個西啦！（你反對而分手？）我從來唔會畀意見影響佢。我見過Mia但唔熟，冇乜特別，佢都有優點，好勤力同努力，佢背景複唔複雜唔代表佢唔想做好自己。」
盼專注學業
郭秀雲又透露Andrew曾向她表示有壓力，但她只叫兒子想清楚，不會影響他的想法，她還打了個比喻：「如果同個小朋友講火好危險，唔好玩會整傷，小朋友會聽話，但如果同一個十幾歲嘅青少年講就唔會聽，一定會試直到受傷、覺得會痛先會知！我只係打個比喻，唔係話Mia係火。Andrew呢個年紀腦部發展吸收好多知識，但受賀爾蒙影響會將事情攪亂晒，所以我成日同佢講，唔理同邊個女仔拍拖，我唔反對，但想佢集中讀書先。」
問到有否因兒子分手事件而與關係疏離的前夫錢小豪聯絡？她說：「我只有同嫲嫲（錢小豪媽咪）聯絡。嫲嫲好錫囝囝，每次返港佢哋都有聯絡，我有時會同佢哋一齊聚會。嫲嫲有同我講過對於囝囝拍拖有少少唔開心，當時我仲反過嚟安慰佢。」雖然郭秀雲口口聲聲指對Mia不反感，但提起Andrew的前女友即讚不絕口：「囝囝唔係第一次拍拖，佢前女友好乖，兩個仲保持聯絡。」
仔大仔世界
另一邊廂，記者致電錢小豪，問他對兒子甩拖會否感可惜？他說：「唔應該咁講，佢兩個人選擇。（壓力大？）唔清楚，唔介意個仔選擇。」提到有指嫲嫲不喜歡Andrew拍拖？當時正與母親飲茶的他即詢問母親，並說：「佢冇唔鍾意，係個女人亂噏！佢（郭秀雲）唔鍾意，唔好話我哋啦！不過唔緊要，個仔咁大，拍拖又唔係乜嘢。」而叔父錢嘉樂對姪兒的感情事亦表示從不干涉：「我哋好少傾感情事，做呢行咁耐唔會畀太大壓力啲後生仔，亦唔聽見嫲嫲對佢拍拖有咩意見。」
記者還聯絡身在洛杉磯的Andrew，問到是否因媽咪或嫲嫲反對而分手，他無奈地說：「我都唔知，我唔知嫲嫲依家點諗，我同Mia一齊時都有帶過佢見嫲嫲，當時仲好鍾意佢。媽咪其實都OK開放，但有啲大女人，咁媽咪都有自己嘅壓力。」Andrew表示即使與Mia分手，每日均會通電話，還千叮萬囑記者不要騷擾她：「Mia外表好堅強，其實佢好弱，身體又唔好，成日都出入醫院。我哋仲係好朋友，我都會一樣關心佢。」
另外，新八模寫真最近曝光，Mia與Hazel各自出浴冧宅男，Mia直言拍照時只怕被電死，不怕撞橋：「沖涼嘅嘢好私人，唔使人擦背，各有各沖。（怕高炒走光？）我同Hazel係打底兵團。（收起『事業線』？）沙灘相先有。」
Mia齋Sell可憐
新八模的潮媽Mia亦玩出浴，身穿魚網上衣加白色短褲，更大玩「無辜眼」，予人楚楚可憐的感覺。
噴血度︰2星