曾國祥近日涉及多角戀，其父曾志偉以「點餸」形容兒子多女友，因而觸怒事件主角之一的A. Lin，還以「做人要專一啲」來反擊，好姊妹DaDa Lo則借Blog撐到底！對於事件未平息，志偉、梁靖琪（Toby）、梁政珏、鄧穎芝及森美等昨晚錄影《超級遊戲獎門人》時，志偉不改調皮本色說：「依家啲女仔比較現代，唔知以前用菜稱呼女啫！我都係講笑，既然大家都咁認真，咁我就唔好參與喇！」
進行遊戲時，獎門人大灑鹽花，導演火火於「搵啖食」遊戲中，食不到太陽蛋，森美即笑說：「男人唔食隔夜蛋！」志偉說：「你哋唔食蛋，係食撻啫！」其後更拿了一個撻給EO2的Eric食，誰知Eric食到一面都是，森美笑他「賴」撻，志偉說：「食唔到唔緊要，唔好賴嘛！」而Eric玩「坐波波」遊戲時，「下下」飛身，錢嘉樂笑他是「舂坎角」！至於公私兩忙的Toby透露，公司生意不俗：「有7、8單等住，之後8月會開劇，同佘詩曼合作，好期待！我想下年結婚，可惜未有對象！」剛從南非返港的梁政珏透露，無法送公公最後一程。
