阿嬌前日穿上吊帶低胸連身裙拍攝新廣告，她大方透露獲廣告商加人工：「好開心同滿意！」她表示一直不知自己身價：「公司會為我爭取最好價錢！（覺得自己身價值幾多？）不願自評，高又驚冇人搵，平又違反公司意願！」對於近日有指方力申將與鄧麗欣結婚，曾與小方同遊瑞士的阿嬌冷淡地說：「唔知！唔八卦，唔睇報紙同雜誌，冇需要知！過兩日會同佢一齊出席活動，到時求證吓！（唔戥佢高興？）未求證唔回應，太多八卦充斥個腦會令人變質同唔『升呢』！」但她直認與小方仍是朋友。

穿上長裙的阿嬌，落樓梯時小心翼翼。

對於「舊愛」小方傳婚訊，阿嬌坦言若屬實定必送祝福。

誠徵「筍盤」　

問到若兩人結婚會否送祝福？阿嬌說：「如果、如果、如果係真會送祝福！（佢哋襯唔襯？）開心就得！」目前單身的她抵死地問記者有沒有「筍盤」介紹：「如果有都會即刻結婚！（公司畀？）講吓啫！」她自爆曾心思思結婚：「曾經閃過一刻衝動，不過諗深一層冇可能。」被追問對象是誰時？她僅以「如果」作結。