自細喺外國長大嘅無綫花旦李詩韻，廣東話講得係流利，但平日同小小So傾偈都仲係「鬼聲鬼氣」，佢亦好大方承認中文水皮，只得小二程度。但為咗喺娛樂圈有好嘅發展，同埋希望可以演好每一個角色，佢就真係好努力惡補。雖然廣東話真係學到啲老外「抓」晒頭，不過日子有功，詩韻真係比以前進步咗唔少，「蝦碌」唔係話冇，但有時一啲「蹺口」嘅俗語或者名詞，竟然難佢唔倒，唔信……等小小So話你知啦！
話說詩韻嘅美容學校早排開張，好多朋友送花籃、花牌賀佢榮升老闆娘，開心到跳起嘅佢，猛拉住啲Friend話去「花牌」陣前面影吓相，啲Friend即時啋啋聲咁話「大吉利是」：「吓！放喺殯儀館嗰啲先叫『花牌』，你舖頭嗰啲係叫『花籃』喎！」搞到詩韻好鬼尷尬，面都紅埋。不過有小小So就冇煩惱，小小So拉埋詩韻一二角，然後細細聲同佢講：「你講得冇錯呀！咪鬼理佢。」佢O晒嘴問：「真係……」小小So就話：「放喺殯儀館嗰啲統稱『花圈』，喜慶嘢就叫『花籃』或者『花牌』。」
詩韻拍拍心口，抖抖大氣咁話：「學咗咁多年廣東話，咁都冇咁Hurt，唔係就真係瘀到爆喇！」小小So笑吓又拍吓佢膊頭，話畀佢5個叻，佢即時笑晒口猛話多謝。