近港姐王君馨最近忙緊拍攝飲食節目《為食總司令》，除咗介紹本地美食之外，仲遠赴海外拍外景，最近就去咗澳洲。有次節目出街後，畀觀眾投訴生劏大龍躉太殘忍，小小So都有睇嗰集，畫面又的確幾血腥！小小So打畀佢問番兩句，原來佢身在外地，第一句已經質到小小So O晒嘴！
王君馨 ：你知唔知我依家喺澳洲o架？
小小So：唔知！
王君馨 ：我依家喺澳洲拍緊嘢呀！
小小So：唔好意思，我唔知你喺外地，咁你方唔方便回應幾句呀？
可能王君馨自知失言，態度又突然180度急轉，變番平日公仔箱中嘅佢，回應有關投訴。其實整個回應都係嗰幾分鐘，長途電話費係好貴，不過又用得幾多錢呢？如果本身份人係咁孤寒嘅，不如乾脆熄咗電話咪一了百了囉！