無綫藝人梁靖琪（Toby）昨日駕車往九龍城Shopping，將座駕停泊在路邊，其後有玻璃窗爆裂，碎片突然從天而降，其座駕車頭及車頂多處刮花，幸好她當時不在場，否則大有可能受傷！

Toby事後仍猶有餘悸：「我買完嘢諗住返去攞車，但又想買杯嘢飲，就喺呢個時候，有街坊話我知有塊玻璃跌咗落我架車度，我嚇一跳，即刻返去了解，見到成地玻璃碎，車頭同車頂刮花咗，聽講有個女途人受驚，上咗十字車。我當時六神無主，個腦一片空白。」

得悉寶貝女的座駕出事後，Toby父母立即趕往現場了解。

放大圖片

Toby父親、無綫高層梁家樹，立即偕太太到場了解，Toby說：「事發單位嘅戶主係傷殘人士，我唔打算追究，但問過相熟車房，維修要萬幾兩萬蚊，好心痛，不過最緊要冇人受傷。之前鐵騎士話我車親佢單嘢啱啱Settle Down，依家又發生呢件事，好黑！（轉做乘客？）等我搵多啲錢先，如果唔係，都要自己做司機。」

警拘裝修工人

警方發言人證實昨午5時22分，九龍城獅子石道發生一宗高空擲物事件。發言人指事發前，現場有裝修工人安裝冷氣，期間有玻璃墮街，警方接報到場後，拘捕一名48歲梁姓裝修工人，而一名58歲陳姓女子受驚，需送院檢驗，警方暫列作高空擲物有車損毀事件處理。