以「完美男人」來形容亞洲萬人迷吳尊，絕不為過。吳尊高大有型、靚仔有米、跳得唱得、異性緣旺，是不少女生朝思暮想的白馬王子！不過貴為萬人迷，他的「尊」容自然備受矚目，尤其是其感情世界，更是不少「尊迷」的焦點。

吳尊出道至今，緋聞情史多籮籮，每逢跟女演員拍劇，例必爆出緋聞，包括《公主小妹》的張韶涵、《東方茱麗葉》的林依晨及《花樣少年少女》的S.H.E成員Ella等，異性緣超旺。雖然與對手屢傳緋聞，難得吳尊毫不避忌，甚至取笑喜歡Ella作中性打扮！除了鬧緋聞外，甚至有傳他已在汶萊結婚生子，早前飛輪海舉行演唱會，有兩名與他儼如「餅印」的小朋友撐場，吳尊解釋小朋友是他的外甥及外甥女，更願意驗DNA以示清白！

怕醜仔冇被催婚

仍是單身貴族的吳尊，絕對是一個「筍盤」，但他對感情事採取順其自然的態度，由於工作忙，他狂呻連拍拖的時間也沒有。問到家人有否催婚？他說：「我一年返一兩次汶萊！佢唔會催我，會放喺心唔講出嚟，我知佢心意，因為我同佢都好怕醜！」問到會否揀圈中人做女友？他說：「最緊要睇吓感覺啱唔啱，性格最重要，冇乜特定嘅擇偶條件！（主動出擊追女仔？）我會諗好多嘢，好似工作時間點分配，同埋要作出某啲犧牲。」

吳尊擁有高大身形，螢幕上常展示雄赳赳一面，但原來他亦有鐵漢柔情的特質。提到最浪漫的戀事，他說：「15歲嗰陣，喺汶萊海邊第一次鼓起勇氣拖住女仔隻手；亦試過特地去學女友鍾意食嘅菜，炮製佢鍾意食嘅餸！」圈中興瞞婚及瞞戀情，問他拍拖會否公開？他說：「睇情況，我唔會介意公開，只要唔影響對方正常嘅生活。（結婚都公開？）睇狀況，我希望公開，只係唔希望家人因為我嘅身份而太辛苦！」吳尊處處維護家人及未來的另一半，認真貼心！至於會否生小朋友？他說：「當然會！（嚴父或慈父？）我覺得既是嚴父也是慈父！」

痛心Fans驚險追星

吳尊歌、影、視三棲發展理想，所到之處備受Fans愛戴，不少Fans對偶像也有奇怪要求及過激的行徑，他笑說：「曾經有內地Fans，將自己嘅護照交畀我，仲叫我帶佢走，當時真係嚇親大家。」談到Fans追車問題，吳尊苦口婆心說：「有時覺得好無奈，跟得太快同太近，好危險，咁樣不顧自己同他人安全，真係唔好！有時候我都喺個Blog嗰度提醒佢哋，亦試過直接同Fans講，唔希望佢哋咁做！」問到會否以演藝事業作終身職業？吳尊說：「要睇狀況，如果做得開心，就會一直做落去，（演舞台劇？）如果有適合題材，都肯嘗試。（拍戲底線係乜？）唔着衫係OK，但唔會脫清光。」

雖然吳尊已是萬人迷，但他亦有心儀合作的男、女藝人，他說：「男藝人係韋史密夫，因為好鍾意佢演嘅電影《Bad Boys》，好想同佢做Partner；女藝人反而冇特別去諗！」除了演藝事業外，吳尊在家鄉亦要打理健身室生意，相當忙碌，問到如何分配時間？他說：「依家唔可以事事親力親為，所以要帶定電腦出埠，Update公司嘅最新狀況。（開分店？）想喺上海開分店，邁向國際化！」

後記：與大東兄弟情深

有指吳尊與飛輪海成員汪東城屢傳不和，惟他極力否認，又表示與飛輪海成員相處愉快，他透露於將8月推出新專輯。問到報道有否影響兄弟情？他說：「嗰啲都係媒體寫，大家對呢啲報道冇晒感覺！我們睇完都係一笑置之，唔會太在意。（圈中朋友多唔多？）又唔算多。（少咗同圈外朋友見面？）都係，因為真係太忙，朋友都好奇係咪真係咁忙。」