近期憑劇集《掌上明珠》人氣急升的商天娥（娥姐），今年10月3日與拍拖5年的燈飾商人男友李偉誠（Patrick）拉埋天窗。娥姐連月來積極收身，還忙於四出辦嫁妝！據知，其婚紗及晚禮服全由外國設計師設計，色調主要是白、紫、綠、紅；至於新郎哥則以黑、白、銀色禮服為主。

放大圖片	娥姐試戴多套名貴首飾，Patrick更出手為她戴頸鏈（左圖）。	放大圖片

日前，記者發現一對準新人現身尖沙咀，邊講邊笑步進某大型珠寶店後，娥姐即在店內左睇右望，又拿起店內的「糖果」嗒糖，一副冧樣。二人先從婚戒入手，雖然款式繁多，但為人實際的娥姐看中一對款式簡約的玫瑰金鑲鑽婚戒，價值約五位數字。縱然婚戒從簡，但娥姐挑選其他首飾配襯禮服卻十分講究，「軍師」Patrick亦揀選店內最名貴的頸鏈首飾，不時親自為娥姐試戴上，逗得娥姐「四萬咁口」。

Patrick與娥姐精挑細選，最後選中一對簡約款式的玫瑰金鑲鑽婚戒。

放大圖片

400萬元鑽鏈襯晚裝

試戴一輪後，二人扑錘選定兩套心頭好，分別是價值20多萬元的大溪地黑珍珠頸鏈，以及價值400多萬元的南洋珍珠鑲鑽頸鏈！此際，店員突然拿出一隻天鵝款式的戒指，娥姐甫見傾心，只見Patrick跟她耳語數句，娥姐即開心得彈起，更立即將戒指戴上手左看右看。二人在珠寶店內逗留了約一小時後離開，十指緊扣前往附近食店醫肚。

揀首飾後，二人拍拖覓食醫肚，零舍好胃口。

娥姐與Patrick拖手出巡，恩愛辦嫁妝。

事後記者聯絡娥姐，她直認與未婚夫拍拖辦嫁妝，談到該天鵝戒指，她笑不攏嘴地說：「呢個係我『老公』送畀我嘅結婚禮物，佢話係為我度身訂造。（幾多錢？）唔講得，只可以話你聽個名叫純美，純潔美麗，而且仲鑲咗好多鑽石托住粒珍珠，寓意我好名貴！」記者再向該珠寶店查詢，得悉天鵝戒指由一粒大珍珠配以四卡碎鑽鑲嵌而成，價值逾14萬元。Patrick如此浪漫又闊綽，難怪娥姐冧得一陣陣，疊埋心水做個開心新娘！