今個星期啜核金句好有「曲線」特色，如「宇宙最強」甄子丹曲線讚老婆先係最強；被懷疑整容嘅羅凱珊（Kama）曲線讚自己靚，可謂句句精警！
咪神Single論
「無綫新咪神」梁政珏被傳因不滿男友Eri相約薛凱琪夜蒲而大感不滿，搞到吵大鑊鬧分手，問梁政珏係唔係同Eri感情有變？佢竟然話：「我係單身，都單身咗三年！」
解讀：呢個世代「單身」一詞愈來愈含糊，其實重點唔係梁小姐係唔係單身，而係佢想同Eri講呢三年嘅時間，同單身冇乜分別，所以感情冇變。
Aaron愛關注
郭富城（Aaron）同緋聞女友熊黛林（Lynn）成日玩最Hit嘅微博，佢哋仲互相關注，城城就咁講：「我關注咗好朋友！」
解讀：經歷N次「攻城」，Lynn雖然贏咗個杧果，但好似仲未贏到女友名分！努力呀Lynn！
Kama自信爆燈
羅凱珊（Kama）冇見一排，肥咗、個鼻直咗，但唔見靚咗，問佢有冇整容，天真嘅佢咁話：「冇所謂，大家覺得我靚咗都開心！」
解讀：審美眼光太主觀喇！Kama自信到冇人有，佢話人哋覺得佢靚咗咪得囉！最緊要開心。
顏子菲講多錯多
亞姐顏子菲搭上亞視導演謝松軒，即被網民話佢係狐狸精，但佢冇痛定思痛，仲話：「我冇諗過破壞人哋家庭，我哋好鍾意對方！」
解讀：王菲有隻陳年舊歌咁唱：「菲菲不停問我，是我犯錯嗎？多講反而是錯！」菲菲唔好講咁多喇！你已經破壞咗你份工喇！
甄子丹老婆第一
港產片《葉問2》同西片《鐵甲奇俠2》票房鬥得激烈，問「宇宙最強」嘅甄子丹有冇信心最終打敗《鐵》片，佢就話：「好難講，不過如果你問我分勝負重要，定係返屋企食飯重要，我就會話你知返屋企食飯緊要啲喇！」竟然借用戲中對白自幽一默。
解讀：丹爺貴為「宇宙最強」，新片票房當然係最強，但係「宇宙最強老婆」係汪詩詩，怕老婆會發達，依家佢片酬咁高就係印證，梗係要返屋企食飯啦！