汪明荃（阿姐）出名守時，但有份同佢做搞笑節目嘅王祖藍同阮兆祥出席慶功宴竟然遲到！唔知係咪阿姐做得搞笑節目多，心境變得平和，竟然仲笑騎騎對住兩位「作遲人」，一句都冇鬧喎，小小So睇到都嘖嘖稱奇！話說當日慶功宴喺12點開波，阿姐最早到，之後就到李思捷。但祥仔同祖藍一直未見影。阿姐一於話之你，同高層何麗全咬耳仔同做訪問；小小So仲睇到思捷等到頸都長埋，未齊人悶到玩手指過日辰。
半粒鐘後，祖藍終於現身，但佢好識做，立即飛身向阿姐沙冧，氹到阿姐好開心。但遲成粒鐘嘅祥仔，嚟到只顧口花花撩司儀呂慧儀：「喂！靚女！」好彩祥仔人緣搭夠，阿姐冇嬲佢，仲同祥仔不停吹水添！
但呢個世界一山還有一山高，一遲還比一更遲。有份上過節目嘅欣宜，喺大家差唔多飲飽食醉嘅時候終於肯現身，佢遲唔係好多，只有粒半鐘啫！小小So問佢點解咁遲，欣宜就話「Sorry Sorry！」都係嗰句啦，遲到好過冇到！